Монголд барилга орон сууцны 1кв.м-ын үнэ одоогын байдлаар 800-1200 долларын ханштай байна. Энэ ханш цаашид ч өсөх хандлагатай, харин өсөхгүй байх боломж байна уу?!
Улс орны бүтээн босголтод төр засаг 2006 онд 60 тэрбум төгрөг, 2007 онд 400 тэрбум төгрөг буюу урьд оныхоос дөрөв дахин их мөнгө, 2008 онд 590 тэрбум төгрөг төсөвлөжээ. Цаана нь хувийн олон компаниуд барилга барихаар төлөвлөсөн нь ойлгомжтой. Ингээд үзэхээр манайд барилга барих маш их эрэлт хэрэгцээ байгааг харуулж байна. Гэвч барилга барихад хангалттай түүхий эд, бараа материал манайд бий юу?
Өнгөрсөн онд дотооддоо барилгын гол материал болох цемент, арматурыг нийтдээ 250 мянган тонныг үйлдвэрлэжээ. Гэтэл манайд зөвхөн албаны тооцоогоор жилд 800 мянган тонн цемент арматурын хэрэгцээ байдаг гэж үздэг. Энэ их түүхий эдийн эрэлт хэрэгцээг манайх урд хөршөөсөө ханган нийлүүлсээр олон жилийн нүүрийг үзэж байна. Гэвч жил ирэх тусам байр орон сууцны үнэ “тэнгэрт хадсаар” л. Үүнд гол хоёр хүчин зүйл нөлөөлж байна.
1. Барилгын материалын дотоодын үйлдвэрлэл бага
2. Урд хөршөөс нийлүүлж байгаа барилгын материалын тээврийн асуудал хүнд зэрэг юм.
Гэтэл манайх дотооддоо цемент, арматур үйлдвэрлэх хангалттай нөөц баялаг бий гэж үздэг. Зөвхөн үйлдвэр байгуулах асуудал л гацаанд ороод байгаа юм байна. Энэ нь газар авах зөвшөөрөл, үйлдвэр барих зөвшөөрөл гээд бүх зөвшөөрөл лицензийг өөр өөр яам газруудаас авдаг бөгөөд тэдгээр нь тус тусын хүнд суртал, хээл хахууль, өөрсдийн ашиг сонирхолыг илүүд үзэх зэргээр төрийн бүтцийн буруу бодлогоос шалтгаалан үйлдвэрүүд шинээр баригддаггүй байна. Манай улс энэ төрлийн үйлдвэрийг дотооддоо нэлээдгүй барьж чадвал барилгын материалын нийлүүлтийн асуудлыг шийдээд зогсохгүй барилга, орон сууцны үнийн хөөрөгдлийг бууруулах боломжтой юм.
Барилга.мнН.Уранзаяа
СЭТГЭГДЭЛ БИЧИХ
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.