Нийслэл хотын баруун дөрвөн замын урд талын төмөр зам дээгүүр авто замын гүүрэн гарц барих нарийвчилсан судалгаа хийх санамж бичигт гарын үсэг зураад байна.

Одоогоос есөн жилийн өмнө Японы Олон улсын хамтын ажиллагааны нийгэмлэг ЖАЙКА-гаас нийслэлийн замын хөдөлгөөний Мастер төлөвлөгөө боловсруулсан билээ. Энэ дагуу Улаанбаатарт одоо байгаа төмөр зам дээгүүрх хоёр гүүрээс гадна нийслэлийн төвд авто замын шинэ гүүрэн гарц байгуулах хэрэгтэй гэж үзжээ.

Монгол Улс техник технологи, хөрөнгө санхүүгийн бололцоо дутмагаас 2005 онд уг барилгын ажлыг Японы буцалтгүй тусламжийн хүрээнд хамруулан хэрэгжүүлэх хүсэлт тавьсан юм. Хүсэлтийг Япон Улсын Засгийн газар хүлээн авч уг барилгын ажлын бэлтгэл судалгааг хийлгэхээр шийдвэрлэсэн. Судалгааны үр дүнг нь үндэслэн, төслийн хэрэгцээ болон үндэслэлийг гаргуулах зорилгоор ЖАЙКА-гийн судалгааны баг ирээд байгаа аж.