Монголын Барилгын Инженерүүдийн Холбооны
“Оны шилдэг бүтээл”, “Оны шилдэг инженер”, “Оны шилдэг оюутан”
Шалгаруулалтанд нэр дэвшүүлнэ үү!

Тус Холбооны Удирдах Зөвлөлийн 2001 оны 11-р сарын 14-ний өдрийн хурлаар баталсан Холбооны нэрэмжит шагнал  олгох журамд Холбоо нь гишүүдийнхээ мэдлэг боловсрол, мэргэшлийн ур чадвар, бүтээл, туршлагыг үнэлж дүгнэх, дэлгэрүүлэх, тэднийг алдаршуулах замаар Холбооны дүрэмд заасан үндсэн зорилтыг хэрэгжүүлэх зорилгоор өөрийн нэрэмжит шагналыг олгоно гэж заасан байдаг. Үүнийг хэрэгжүүлэх зорилгоор 2001 оноос эхлэн шилдэг гишүүд, шилдэг бүтээлийг жил бүр шалгаруулдаг уламжлал тогтоод байгаа билээ. Энэ шалгаруулалтад болзлыг хангасан хэн ч оролцож болох ба нэр дэвшсэн бүтээлүүдийг Холбооноос томилсон сонгон шалгаруулах комисс урьдчилж тогтоосон үзүүлэлт бүрээр оноо өгч дүгнэн дүнг гишүүдэд танилцуулсаны дараа нууц санал хураан олонхийн саналаар бүтээл болон гишүүнийг шалгаруулдаг юм.

“Оны Шилдэг бүтээл”-ийн шагнал горилсон бүтээл нь шинэлэг, дэвшилттэй, техник эдийн засгийн үзүүлэлт өндөртэй, байгаль орчинд халгүй, хэрэглэгчийн эрэлт хэрэгцээнд нийцсэн, асуудлыг иж бүрнээр шийдсэн байна. Бүтээлүүд нь хэрэгжсэн, хэвлэгдсэн байх ба төсөл дүгнэлтийн хэлбэртэй бол батлагдсан байна. Шилдэг бүтээлийн шагналд төрөл бүрийн барилга байгууламж, зураг төсөл, шинэ материал, бүтээц, технологи, интерьер, экстерьер, ном, сурах бичиг, экспертизийн дүгнэлт болон инженерийн оюун ухаан, арга, технологийг, хөгжүүлэхэд түлхэц болох бүхий л бүтээлүүдийг дэвшүүлж болно.

“Оны Шилдэг оюутан”, “Оны Шилдэг залуу инженер”, “Оны Шилдэг инженер” тус бүр нэг гишүүнийг шалгаруулж шагнана. Шагнал горилогч нь сурлагын эсвэл ажлын үзүүлэлт сайтай, мэргэжил дээшлүүлэлт, бүтээл туршлага, ёс суртахуун өндөртэй, тэргүүний хүн байна.

Бүрдүүлэх материалд:

• Шагнал горилсон өргөдөл
• Холбооны ажилд оролцсон тайлан /Холбооноос зохион байгуулсан үйл ажиллагаа, хурал, семинарт оролцсон байдлыг тусгаж болно/
• Ажил байдлын тодорхойлолт /оюутан бол сургуулийн тодорхойлолт/
• Бүтээлийн тайлан зэрэг зүйлс багтана.

Шагнал горилогсдын материалыг 2009 оны 12-р сарын 10-ныг дуустал Холбоон дээр хүлээн авна.
Шагналын болзол, шалгаруулах журам болон холбогдох бусад мэдээллийг 330985 утсаар лавлах болон http://www.mace.org.mn хаягаар орж үйл ажиллагаа меню доторх шагнал дэд меню-ээс үзэж болно.