Чингэлтэй дүүргийн 7, 8 дугаар хорооны 120 га газар нутагт орон сууцны иж бүрэн  хороолол баригдах нь. Тодруулж хэлбэл, Зурагтын орчмын гэр хорооллын айл өрхүүд орон сууцтай болох эхлэл тавигдаж байна. Тус дүүргийн 7,8 дугаар хорооны 3000 гаруй иргэн дүүргийнхээ засаг даргад газраа худалдан орон сууцтай болох саналыг тавьснаар тус гэр хорооллын дахин төлөвлөлтийг Хот байгуулалт, эрдэм шинжилгээ, зураг төслийн хүрээлэнгээс дүүргийн болон нийслэлийн засаг даргын дэмжлэгтэйгээр боловсруулж эхэлжээ. Чингэлтэй дүүргийн 7,8 дугаар хорооны нутаг дэвсгэрийг дулаан болон цэвэр бохир усны шугаманд холбоход  тун бага зардал зарцуулах аж.

Монголын үндэсний олон нийтийн  радио, телевизээс ердөө нэг км газарт шугам татахаар төлөвлөжээ. Орон сууцны  хорооллыг  гадаад, дотоодын хөрөнгө оруулалтаар барих бөгөөд энэхүү бүтээн байгуулалтад оролцох саналыг хэд хэдэн  байгууллага  тавьсан гэнэ. Орон сууцны  хорооллыг  зургаан үе шаттайгаар  барина. Гэхдээ аль хэсгийн оршин суугчид орон сууцтай болох саналаа илүү өгсөн хэсгээс барилгын ажлыг  эхлэх юм байна. Тийм учраас орон сууцны  хороолол барих ажилд иргэд, дүүрэг нийслэлийн хамтын ажиллагаа чухал аж. 40, 50 мянгатын хорооолол шиг 60мянгатын хороолол чингэлтэй дүүргийн 7,8 дугаар хороонд сүндэрлэх цаг ойртож байна.