Монгол Улсын өмнөд бүсийн дэд бүтцийн стратеги, төмөр замын байгууламжийн асуудлаар УИХ-ын Эдийн засгийн байнгын хорооноос гаргах тогтоолын төслийг хэлэлцэх нь зүйтэй хэмээн өчигдөр шийдлээ. Гэтэл Засгийн газар өөр байр суурьтай байна.

 

Төмөр зам барихын тулд техник, эдийн засгийн үндэслэл тооцоо, үндэсний аюулгүй байдалтай холбоотой улсын ашиг сонирхол зэргээс эхлээд гүйцэтгэх засаглалын хэмжээнд эхлээд шийдвэрлэсэн байх ёстой олон асуудлыг эцэслээгүй учраас тогтоолын төслийг хэлэлцэхээ хойшлуулж өгөхийг Зам, тээвэр, барилга, хот байгуулалтын сайд Х.Баттулга хүссэн юм. Гэвч Байнгын хорооны олонх гишүүн түүний үгийг ойшоосонгүй. Энэ сэдвээр сайдаас тайлбар хүссэн юм.

 

 

-Асуудлыг Байнгын хороогоор шуурхай хэлэлцье гэдэг нь зөв. Харин салбарын бодлогыг зангиддаг яамнаас нь санал аваагүй байж асуудлыг хэлэлцэх гэж байгаад нь би шүүмжлэлтэй хандсан. Төсөл дээр мэргэжлийн хүмүүсээ ажиллуулъя, тодорхой хугацаа өгөөч л гэж хүссэн.

 

Гашуунсухайтаас урд хил рүү нарийн төмөр зам тавина гэсэн төслийн заалттай санал нийлэхгүй байна. Энд хувийн компанийн ашиг сонирхол яваад байгаа. Ийм зарчмаар асуудалд хандах юм бол улс оронд өгөх өгөөж нь бага байх болно гэж үзсэн. Ордуудаа түшиглэж нэмүү өртөг шингэсэн боловсруулах үйлдвэр байгуулахыг Засгийн газар дэмжиж байгаа. Тэгж байж хүмүүсээ ажилтай болгоно. Гэтэл түүхий эдээ түүхийгээр нь зөөх тухай ярьж байна. Үүнтэй санал нийлэх боломжгүй. Зөрчил эндээс эхэлсэн. Жилдээ 40-50 сая тонн нүүрс гадагш зөөх хүчин чадал бүхий нарийн төмөр замыг Хятадын компаниар тавиулах гэж байна. Ингэснээр монголчууд гадаадын хараат төмөр замтай болж хувирна. Үүнээс бид болгоомжлох хэрэгтэй.

 

Өнөөдөр