Баянгол дүүргийн 4-р хорооны нутаг дэвсгэр буюу “Тэх”-ийн зогсоолын ойролцоо үйл ажиллагаа явуулдаг “Суурь” ХХК-ийн бетон зуурмагийн үйлдвэрт өчигдөр дэлбэрэлт болж, гурван хүний амь нас эрсэдсэн харамсалтай явдал болов.  Нийслэлийн шуурхай бүлэгт 12.43 цагт өгсөн дуудлагын дагуу аврах гал унтраах 10, 14, 18, 26 дугаар ангиудаас найман автомашин, 40 гаруй гал сөнөөгч ослын газарт ажилласан байна. Аврагчид 20 минутын дотор галыг унтраасан боловч асар их утаа олгойдон, аврах ажиллагаа явуулахад хүнд байжээ.

Үйлдвэрийн нэгдүгээр давхарт гарсан гал дээш авалцаж, найман давхар барилгыг бүхэлд нь хамарсан бөгөөд үүний улмаас хоёр хүн түлэгдэж, нэг нь угаартан газар дээрээ нас барсан байна. Тэд үйлдвэртээ 3-5 жил ажилласан туршлагатай хүмүүс байсан ч яагаад ийн осолдсоныг нь гайхаж буйгаа хамт олон нь санаа алдан өгүүлсэн юм. Биднийг тус компанид очиход гал унтраахаар цацсан  ус хөлдөж, хиншүү, хярвас үнэртэн, хар эрээн болсон байшингийн хагархай цонхоор утаа савсаж байв. Хэдийгээр дуудлага өгснөөс хойш 20 минутын дотор аврагчид ирсэн ч дотор байсан хүмүүс нас барчихсан байсан гэж тэндхийн манаач ярив. Энэ чиглэлээр 20-иод жил үйл ажиллагаа явуулж байгаа гэх “Суурь” ХХК-ийн ерөнхий захирал Х.Чинболдоос яагаад ийм зүйл болсныг тодруулахад,

-Тэр үед дөрвөн залуу үйлдвэр дотор засвар хийж байсан. Тэд бетон зуурмаг  хөлдөөдөггүй бодисыг өргөгч машинаар дээш өргөхөөр ачсан байсан. Энэ үед шатны бүх таг онгорхой байснаас гагнуурын оч бодис ачсан өргөгч дээр унаж гал авалцсан байх гэж бид таамаглаж байна. Талийгаачидтай хамт ажиллаж байсан залуугийн яриагаар утаа үнэртэн, гал гарч эхлэх үед тэрбээр бусдыгаа дээшээ гарцгаая гэж анхааруулахад сандарсан хүмүүс доош буух гэж галын өөдөөс гүйсэн юм билээ. Тэр залуу бага зэрэг угаартсан ч ослын шатаар гүйж, амь гарч чадсан байсан. Яг гал авалцаж байх үед манайхаас хүмүүс дотогш орох ямар ч боломж байгаагүй. Олгойдсон их утаан дунд хамгаалалтын багтай аврагчид хүртэл арван минут ажиллаад л хүчилтөрөгчөө сэлгэхээр гарч ирж байсан гэв.

Өнөөдөр