Монгол Улсад ногоон техник, технологийн нэг болох салхин цахилгаан станцын төслийг хэрэгжүүлэх ажлын нэг Төвийн эрчим хүчний системд шинэ, ногоон технологид суурилсан цахилгаан станц байгуулах төслийг “Ньюком” групп 2004 оноос хэрэгжүүлж байна.

 

Энэ төслөөр Төв аймгийн Сэргэлэн сум нутаг дахь Салхит уулын орчимд Монголын анхны их чадлын, 50 МВт суурилагдсан хүчин чадалтай Салхин Цахилгаан Станц байгуулагдах бөгөөд үйлдвэрлэсэн цахилгаанаа эрчим хүчний хомсдол нүүрлээд байгаа төвийн эрчим хүчний системд нийлүүлэх юм.

 

Тус станц байгуулагдсанаар жилд 120.1 мянган тонн буюу 24 мянган өрхийн жилийн хэрэглээний нүүрс, 1.12 сая тонн буюу 65 мянган өрхийн жилийн хэрэглээний цэвэр ус хэмнэж, 152.8 мянган тонн буюу 400 хүүхдийн паркийн дүйцэхүйц ногоон байгууламжийн агаар цэвэршүүлэлттэй тэнцүү хүлэмжийн хийг бууруулна.

 

Өчигдөр энэ төслийг цаашид хэрэгжүүлэх хамтарсан компанийг байгуулах гэрээнд “Ньюком” групп, Европын Сэргээн Босголт, Хөгжлийн Банк гарын үсэг зурлаа.