“Хааны зам-Вако” компани байгуулан орон сууц барих нэрийдлээр манай улсын 94 иргэнээс 1.5 тэрбум төгрөг залилсан БНСУ-ын харьяат Пак Сон Бун, Жон Жун Хёг нарт холбогдох хэргийг өнгөрсөн даваа гаригт Сүхбаатар дүүргийн шүүх хэлэлцжээ.

Анхан шатны шүүхээс Пак Сон Бунд холбогдох хэргийг хэрэгсэхгүй болгож, харин Жон Жун Хёгийг 10 сая төгрөгөөр торгох ялаар шийтгэсэн байна. Хохирогчдын хохирлын барагдуулах шийдвэр гаргахдаа объектуудыг “Энүжин” компанид шилжүүлэхээр болжээ. Уг нь улсын яллагчийн зүгээс тэдэнд есөн жил хорих ял, 500 сая төгрөгийн хөрөнгө хураах ял оноохоор төлөвлөсөн юм.

Анхан шатны шүүхийн эл шийдвэрийг “Бидний орон сууц” төрийн бус байгууллагынхан буюу тэдэнд залилуулсан иргэд эсэргүүцэж байгаа юм. Тус байгууллагын төлөөлөл Ч.Цогтсайхан, Л.Нансалмаа нарын хүмүүс “Бидний хөрөнгөөр авсан газар, барьж байгуулсан объектуудыг “Энүжин” компанид шилжүүлсэн нь биднийг хохироосон шийдвэр гаргалаа. Уг нь Баянзүрх, Хан-Уул, Сүхбаатар дүүргийн нутаг дэвсгэрт байгаа объектууд бидэнд ирэх ёстой.

“Энүжин” компанийн удирдлага манай зарим захиалагчтай гэрээ хийхдээ нэг ам.метр талбайг 400 ам.доллараар тооцохоор гэрээ байгуулсан. Гэтэл үүнийгээ зөрчөөд 850 ам.доллараар өгнө гээд байгаа. Түүгээр зогсохгүй зарим хүний байрыг давхардуулан зарахаар гэрээ байгуулсан байсан. Анхан шатны шүүхийг ийм шийдвэр гаргана гэдгийг бид аль эрт мэдэж байсан.

Тиймээс шүүхийн харьяаллыг сольж өгөөч гэсэн хүсэлт тавьж байсан ч солих шаардлагагүй гээд уг шийдвэрийг гаргалаа” гэсэн юм.