Барилга МН

Хороололд хуучин 3 өрөө байр 70.000.000 төгрөг, 2 өрөө байр 60.000.000 төгрөг болж шинэ орон сууцнаасаа үнэтэй болжээ. Юу гэсэн үг вэ? та минь ээ.  6 сарын өмнөхөөс бараг 40 % -аар өсчээ.

            Монгол улсын засгийн газраас 40000 айлын орон сууцны хөтөлбөрийг хэрэгжүүлсээр хэдэн жилийн нүүр үзлээ. Энэ хугацаанд хөтөлбөрийг хэрэгжүүлэгч (ОССК) Орон Сууцны Санхүүжилтын Корпорацаас хөдөө орон нутагт цөөн хэдэн орон сууц ашиглалтанд оруулсан. Харин Улаанбаатар хотод нэг ч орон сууц ашиглалтанд өгөөгүй байна. Анх эхлэхдээ иргэдийг хамгийн хямд орон сууцаар хангана гэж ярьж байсан боловч бариагүй орон сууцных нь үнэ өссөөр л байна. Барьсан хойноо бүр өсөх нь тодорхой болжээ. Нисэх, Яармаг зэрэг газарт барих орон сууцны дэд бүтцийн асуудал одоог хүртэл бүрэн шийдэгдээгүй, цаашид барилгын материалын үнэ яаж өсөхийг хэн ч мэдэхгүй. Иргэд ОССК-д ихээхэн итгэл тавьж байсан боловч одоо нилээд итгэл алдарчээ. Баахан орон сууц захиалах өргөдөл 1000 төгрөгөөр авч байсан боловч тэр нь шоу байжээ. Одоо тэр өргөдөлөөр захиалга авахгүй тэр бол бараг судалгаа байсан гээд төрийн албан хаагчдыг эхний ээлжинд орон сууцаар хангана гэх болжээ. 28000 орон сууц захиалах өргөдөл авсан гэж тооцоход ОССК 28.000.000 төгрөгийг иргэдээс луйварджээ. Тэгээд ч тэр ОССК-ын барих орон сууц хотын төвд биш хотын захад. Хотын захын дүүрэгт орон сууц одоо ч хямдхан байгаа шүү дээ. Хувийн компаниудын хувьд чадлынхаа хирээр орон сууц барьж байна. Тэднийг үнэ өсгөсөн гэж буруутгах арга байхгүй. Зах зээлийн жамаараа явж байна. Энэ үнийн хөөрөгдлийг Засгийн Газраас зохицуулалт хийж чадахгүй нь тодорхой.

            Орон сууцны үнэ яагаад өссөн бэ?        

• Дэлхийн зах зээлд нефть болон газрын баялгийн үнэ өссөн
• Улаанбаатарт орон сууц барих газрын үнэ өссөн
• Барилгын материалын үнэ өссөн
•  Ажиллах хүчний хөлс нэмэгдсэн
• Төгрөгийн ханш үнасан. (Ам.доллартай харьцуулахад нэг их  унаагүй юм шиг боловч, ам.долларыг дагаад бусад валюттай харьцуулахад маш их унасан)
• Барилгын материалын 80 хувийг импортоор авдаг. Төмөр зам ачааллаа даахгүй болсон. 2007 оны хавраас Хятадаас барилгын материал ачуулахад Замын үүдэд 1-2 сар болж вагон хүлээх болсон. Энэ бол нийлүүлэлтийг маш их сааруулж үнийн хөөрөгдөлд маш их үүрэг гүйцэтгэсэн.
• Орон сууцны эрэлт нэмэгдсэн.

            Орон сууцны эрэлт нэмэгдэх шалтгаан:

• Банкнаас иргэд хадгаламжаа маш ихээр татаж үл хөдлөх хөрөнгө болгох болсон. Банкинд мөнгө хадгалуулсанаас орон сууц худалдан авч түрээслээд түрээсийн орлого олоод, үл хөдлөх хөрөнгийн үнэ нь өсөөд ашигтай гэх болсон.
• Банкууд урт хугацаатай хүү багатай зээл өгөх болсон. Мөнгөгүй ч орон сууц худалдан авах боломжтой. Банкууд 70 - 100% -ийн орон сууцны  зээл өгч байна.
• Гадаадын иргэд Монголын үл хөдлөх хөрөнгийн зах зээл дээр маш их хөрөнгө оруулалт оруулах болсон. Хятад, Солонгосууд их авдаг байсан бол одоо Оросууд их хөрөнгө оруулах болсон. Үл хөдлөх хөрөнгийн зах зээл бол мөнгө угаах таатай бөгөөд найдвартай зах зээл.
• Одоо өвөл орон сууцаа зарах иргэдийн тоо бага байдаг. Харин худалдан авах эрэлт их байгаа тул  энэ өвөл орон сууцны үнийн өсөлт бүр их байна.
• Хятад энэ жил олимп болно гээд төмөр замын ачаалал их тул хязгаарлалт хийнэ гэж дуулдсан. Бид барилгын материалын гачигдалд орох нь тодорхой болжээ.

Харин цаашид Орон сууцны үнэ өсөх үү? буух уу? Ингээд тогтчих болов уу? Та бүхэн өөрийн бодол саналаа бичээрэй.

Баагий