Цаасан дээр буулгасан зүйлийг ажил болгох үлдэв

Barilga
2019-11-06

Цаасан дээр буулгасан зүйлийг ажил болгох үлдэв

Нийслэлийн агаар болон хөрсний бохирдлыг багасгах, хүн амыг ая тухтай тохилог орчинд амьдруулахад гэр хорооллыг орон сууцжуулах, цаашлаад шинээр хорооллууд барих шаардлага зүй ёсоор тулгарч байгаа. Улаанбаатар хотыг 2020 он хүртэл хөгжүүлэх ерөнхий төлөвлөгөөний хүрээнд нийслэлийн захын барилгажаагүй газарт төлөвлөгдсөн орон сууцны хороолол барих, одоо байгаа гэр хорооллыг барилгажуулахаар орон сууцны хорооллын хэсэгчилсэн ерөнхий төлөвлөгөөг баталсан. 1990-ээд оноос хойш нийслэлд шилжин ирэх айл, өрхийн тоо нэмэгдэж өнгөрсөн онд хүн ам нэг саяд хүрсэн. Одоогийн байдлаар нийслэлийн хүн амын 59.6 хувь нь гэр хороололд амьдарч байна. Энэ нь орон сууц манайд ямар их хэрэгтэйг харуулах нэг л жишээ юм. Нийслэлийн барилга, хот байгуулалт, төлөвлөлтийн газраас хотын төвийн хэсгийг шинэчлэн барилгажуулах, газар ашиглалтыг сайжруулах, нягтралыг нэмэгдүүлэх чиглэлээр орон сууцны 11 хорооллын хэсэгчилсэн ерөнхий төлөвлөгөөг боловсруулжээ. Улаанбаатар хотын гэр хорооллын хөгжлийн стратегийн хүрээнд хотын төвд ойрхон гэр хорооллыг барилгажуулах зорилгоор 14 гэр хорооллын барилгажилт, төлөвлөлтийг боловсруулсан байна. Эдгээрээс таван хорооллынх нь инженерийн шугам сүлжээний ажлын зургийг гаргаж, энэ онд хэрэгжүүлэхээр болжээ.

Хотын төвд ойрхон гэр хорооллыг барилгажуулна

Хотын төв болон инженерийн шугам сүлжээнд ойрхон дараахь гэр хорооллыг барилгажуулна.Үүнд:

-Баянгол, Чингэлтэй дүүрэг дэх Радио, телевизийн хэрэг эрхлэх газрын орчмын 27 га газарт 2470 айлын орон сууц
-Баянгол дүүрэг дэх VII бичил хороолол орчимд 93 га газарт 9100 айлын орон сууц
-Баянзүрх дүүрэг дэх “Дарь-Эх” орчимд 61 га газарт 2043 айлын орон сууц
-Баянзүрх дүүрэг дэх XIV хороолол орчимд 235 га газарт 9100 айлын орон сууц
-Сүхбаатар дүүрэг дахь 210 га газарт 10000 айлын орон сууц
-Хан-Уул дүүрэг дэх Зайсан хорооллын 7000 га газарт 13200 айлын орон сууц барихаар тусгагджээ.

Гэр хорооллынхон нийслэлийн өнгийг гутаахгүй

Дээрх долоон газрын 10800 гаруй өрхийн талбайд орон сууц барьснаар 49.5 мянга орчим айлын орон сууц босох аж. Өөрөөр хэлбэл, тухайн газар оршин сууж байсан айлыг байраар хангаж, цаана нь 39 мянга орчим айл орон сууцанд орох боломжтой. Тухайлбал, XIV хороолол буюу “Нарантуул” зах орчим амьдарч байгаа 3200 өрхийн газар дээр орон сууц барьснаар 9100 өрх сууцтай болох аж.

Хотын ойролцоох сул талбайд шинэ хороолол босгоно

Хотыг тэлэх, төвийн хэсгийн нягтралыг багасгах зорилгоор хотын ойролцоох сул талбайд шинэ хороолол, хотхоныг барьж байгуулах ажлыг эхлүүлж байгаа. Тэгвэл эхний ээлжинд хэрэгжих боломжтой, хэсэгчилсэн ерөнхий төлөвлөгөө нь батлагдсан дараах хорооллуудад 38450 айлын орон сууц баригдах юм. Үүнд:

-Сонгинохайрхан дүүрэг дэх хотын шинэ төвийн 450 га газарт 10262 айлын орон сууц
-Сонгинохайрхан дүүрэг дэх Баянголын амны орон сууцны хорооллын 180 га газарт 7250 айлын орон сууц
-Баянзүрх дүүрэг дэх “Ургах наран” хорооллын 120 га газарт 10750 айлын орон сууц
-Хан-Уул дүүрэг дэх нисэхийн цагаан хаалга орчмын “Буянт-Ухаа” хорооллын 170 га газарт 10200 айлын орон сууц баригдана.

Гэр хорооллыг бүрэн арилгах боломжтой

Дээр дурьдсан нийт 11 хорооллыг барилгажуулснаар 88 мянга орчим айлын орон сууц баригдах юм. Одоогийн байдлаар гэр хороололд 70 орчим мянган өрх амьдардаг. Тэгвэл дээрх хорооллуудыг барьснаар агаарын бохирдлыг “үйлдвэрлэгчд”-ийг арилгах боломжтой аж. Үүнээс гадна дээрх 11 хорооллыг даган 75600 хүүхдийн сургууль, 37800 хүүхдийн цэцэрлэг, өдөрт 13300 хүнд үйлчлэх өрхийн эмнэлэг, амбулатори, 450 ортой эмнэлэг болон жижиг, дунд үйлдвэр, үйлчилгээний барилга баригдах аж.

Хөрөнгө оруулалт хэрэгтэй

Эдгээр хорооллыг барьж байгуулахад орон сууцны барилгын өртгийг тооцохгүйгээр зам талбай, шугам сүлжээ, инженерийн дэд бүтцийн хангамж, үерийн далан сувгийн ажилд 436.3 сая ам.долларын хөрөнгө оруулалт хэрэгтэй аж. Түүнчлэн, хотын инженерийн хангамжийн эх үүсвэр, шугам сүлжээг өргөтгөх, шинэчлэхэд хөрөнгө шаардлагатай байна. Хэрэв уг хөрөнгө оруулалт шийдэгдсэн тохиолдолд барилгажуулах, орон сууцжуулах үйл ажиллагааг нь эрэлт, нийлүүлэлтээр зохицуулагдах боломжтой ба 7-8 жилийн хугацаанд өөрийн өртгөө нөхнө гэсэн тооцоог гаргажээ.

Иргэдийн мэдэлд байгаа газрыг ямар зохицуулалтаар авах вэ

Бусдын өмчлөлд байгаа газрыг нөхөн олговортойгоор худалдан авах, солих замаар гэр хорооллын оршин суугчдыг орон сууцжуулах нь зүйтэй гэнэ. Үүнээс гадна орон сууцны санхүүжилтийн зээлийн тогтолцоог бүрдүүлэх, иргэдийн амьдрах орчныг сайжруулах, тэдний орон сууцны нөхцлийг дээшлүүлэх зэрэг олон бэрхшээлд анхаарах хэрэгтэй байна.

Цэвэр усны нөөцийг шийдвэрлэх шаардлагатай

Дээр дурьдсан хороолол, хотхоныг иж бүрэн барьсны дараа хоногт дунджаар 101000 метр куб цэвэр ус шаардагдана. Нийслэлчүүд одоогоор хоногт 240000 метр куб ус шахах хүчин чадалтай дөрвөн эх үүсвэрээс хоногт 160000 метр куб ус хэрэглэж байна. Иймд цаашид дутагдах 20000 метр куб цэвэр усны эх үүсвэр, нөөцийн асуудлыг яаралтай шийдэх шаардлагатай тухай холбогдох хүмүүс ярьж байна. Үүнд 48 тэрбум төгрөг хэрэгтэй юм.

Нийгмийн толь