Засгийн газрын “40 000 орон сууц” хөтөлбөрийг хэрэгжүүлэгч Орон сууцны санхүүжилтийн корпорациас “Иргэдэд орон сууцны урт хугацаат зээл олгох”–той холбогдсон хэвлэлийн бага хурал БХБЯ-ны хурлын танхимд 2007 оны 12 сарын 20-ны өдөр болж өнгөрчээ.

Хуралд БХБЯ-ны төрийн нарийн бичгийн дарга Ц.Ганхүү, Сангийн яамны Санхүүгийн бодлого зохицуулалтын газрын дарга Х.Рагчаа, ОССК-ийн гүйцэтгэх захирал Ж.Алдаржавхлан, Улаанбаатар хотын банкны дэд захирал О.Банзрагч, Монгол шуудан банкны зээлийн газрын захирал О.Эрдэнэжаргал нар оролцсон байна.

Олон нийтийн анхаарлын төвд байгаа “40 000 орон сууц” хөтөлбөрийн хэрэгжилтийн явц болон бондын хөрөнгөөр хийгдэж буй барилгын ажлын гүйцэтгэлийн талаар БХБЯ-ны төрийн нарийн бичгийн дарга Ц.Ганхүү, иргэд энэхүү урт хугацаат зээлд хэрхэн хэрхэн хамрагдах, зээлийн нөхцөл, шалгуур үзүүлэлтийн талаар ОССК-ийн гүйцэтгэх захирал Ж.Алдаржавхлан нар хэвлэлийн бага хуралд ирсэн сэтгүүлчдэд мэдээлэл өглөө. ОССК оролцогч арилжааны банкуудтай хамтран 2008 оны 1-р сарын 7-ноос иргэд, төрийн албан хаагчдад орон сууцны урт хугацааны зээл олгож эхлэхээр болжээ.