Өнгөрөгч хагас сайн өдөр буюу 12-р сарын нэгэнд ШУТИС-ийн хурлын их танхимд гурвалсан уулзалт болж өнгөрлөө. ШУТИС-ийн БИАС-ийн оюутны холбоо, багш нартайгаа хамтран энэхүү семинарыг зохион байгуулжээ. Зохион байгуулагчидын зүгээс уг семинарыг “Гурвалсан семинар” гэж нэрлэсэн байна. “Гурвалсан “ гэж нэрлэсний учир нь ШУТИС-ийн БИАС-ийн эрдэмтэн багш, оюутан, Монгол улсын хэмжээнд идэвхитэй үйл ажиллагаа явуулж байгаа барилгын компаниуд оролцож байгаа болохоор ингэж нэрлэжээ. Нэг үгээр хэлэхэд ирээдүйн барилгын салбарын боловсон хүчин, тэдгээрийг бэлтгэдэг их уурхай, Монголынхоо барилгын салбарт хүчин зүтгэж яваа компаниудын уулзалт болсон юм.

Энэхүү семинарыг компаниуд ирээдүйд ажиллах  хүчээ сонгох, тэдэнтэй бүр илүү танилцаж, ажлын байраар хангах гээд өмнөө тулгамдаж байгаа олон асуудлыг аль аль тал нь шийдвэрлэж чадах юм.

Гурвалсан семинарын хөтөлбөр нь үндсэн 2 хэсгээс бүрдэж байсан. Эхний хэсэгт нь удирдан оролцож байгаа компаниуд өөрсдийн үйл ажиллагааны талаар дэлгэрэнгүй танилцуулж, Монголын барилгын сэдвээр илтгэл тавих бөгөөд 2-р байрны 4- давхарт дараачийн үйл ажиллагаа болох компаниудын төлөөлөгч нар оюутнуудтай чөлөөт уулзлалт хийсэн. Семинарт нилээд нэр хүндтэй барилгын компаниуд болох “Авзага трейд”, “Ган хийц”, “Бриж констракшн”, “Барилга.мн”, ”Жигүүр гранд” гээд арав гаруй байгууллага орлцсон юм. БИАС-ийн 1-4-р курсын бүх оюутнууд идэвхитэй оролцож байсан.

Гурвалсан семинарын гол зорилго нь ажил олгогчтой хамтарч  ажиллах боломжийг нээн харуулахад оршиж байгаа юм байна. ШУТИС-ийн БИАС-ийн зүгээс үүнтэй холбоотой арга хэмжээг 11-р сард зохион явуулсныг бид та бүхэндээ сайтаараа дамжуулан хүргэсэн билээ.

Энэ семинараар олон олон оюутнууд ажлын байраа олсон гэдэгт итгэлтэй байна.

Д.Нарантуяа
БАРИЛГА.мн