Эрхэм уншигч танд ээлжит ярилцлагаа хүргэе. Энэ удаа манай сайтын зочиноор “Ди-энд-эн” ХХК-ийн захирал Д.Нямаа гуай оролцож байна.

Танд өдрийн мэнд хүргэе. Та бидэнд өөрийгөө танилцуулна уу?

Намайг Дондогдоржын Нямаа гэдэг. “Ди-энд-эн” компаний захирал. Нийслэлийн 28-р дунд сургуулийг 1983 онд төгсөөд улмаар политехникийн их сургуулийг 1988онд барилгын сантехникийн инженер мэргэжлээр суралцаж төгссөн.

Та манай сайтын уншигч нарт гэр бүлээ танилцуулаач

Миний гэргийг Гэрэлмаа гэдэг. 1988 онд Анагаах ухааны их сургуулийг төгссөн. Одоо хувийн ажил эрхэлж байгаа. Би охин, хүү хоёртой. Хүүг маань Оргил гэдэг. Орос Монголын хамтарсан 3-р сургуулийн 10-р ангид сурдаг. Охин Цахирмаа маань мөн тус сургуулийн 4-р анги. Ам бүл 4-лээ амьдарч байна.

Яагаад энэ мэргэжлийг сонгох болсон бэ?

Миний 2 ах хоёулаа барилгын чиглэлийн хүмүүс. Ах нарынхаа зөвлөсөнөөр энэ мэргэжилийг эзэмшсэн юмаа. Холыг харж зөвлөсөн тэдний зөвлөмж өнөөдөр намайг өдий зэрэгтэй явахад  тусалсан.

Танай компани ямар үйл ажиллагаа эрхэлдэг вэ?

Манай компани нь иргэний ба үйлдвэрийн бүх төрлийн барилга угсралт, засвар засал сантехник цахилгаан, инженерийн шугам сүлжээний угсралтын ажлыг дагнан хийх чиглэлээр 1998 оны 4-р сарын 21-нд байгуулагдсан. Манайд өөрийн орны болон Оросын холбооны улс, Франц, Герман, Япон, Солонгосын хөрөнгө оруулалттай барилгуудад ажиллаж нарийн мэргэжил эзэмшсэн 60 гаруй ажиллагсадтайгаар үйл ажиллагаагаа явуулж байна.

Чухам яагаад “Ди-энд-эн” ХХК-ийг байгуулах болсон бэ?

Зах зээлийн үед хүмүүс дор бүрнээ өөрийн гэсэн хувийн зүйл ажиллуулж эхэлсэн. Тэр үед надад мэргэжлийн чиглэлээрээ компани байгуулах санаа төрсөн юм. Ингээд анх 2 хүний бүрэлдэхүүнтэй “Ди-энд-Эн” ХХКомпаниа байгуулсан.

Танай компани барилгын угсралтын ажил хийж гүйцэтгэдэг. Тэгвэл Монголын барилгын салбарт ямар ямар барилга барьж байсан бэ?

Манай хамт олон 3-р хороололд “Ачлал” их дэлгүүр, Нарлаг төв, Солонгос барааны дэлгүүр, “Эко” констракшн компанийн 80-н айлын орон сууц, “Дэрэн Цант" авто сервисийн барилга, Ус сувгийн удирдах газар, Сүхбаатар дүүргийн шүүх зэрэг олон ажлыг хийж гүйцэтгэсэн. Тун удахгүй бид 10-н жилийнхээ ойг тэмдэглэнэ.

Ямар барилгын сантехникийн ажлыг хийж байсан бэ?

Барилгын гол цудас нь сантехник цахилгааан байдаг. Бидний хийсэн ажлуудаас дурдвал: “Орчлон констракшн”, “Нэмэх трейд”, UBS- телевизийн Балхжав гуайн барилга гээд нийт 200 гаруй барилгын барилга угсралт, салхивчийн ажлыг хиисэн.

Танай компаний давуу тал?

Манай компани нь барилга угсралт, мөн барилгын сантехникийн ажил гээд бүх зүйлийг иж бүрнээр нь хийдгээрээ илүү онцллогтой.

Өөрийнхөө мэргэжилээ хүүхдүүддээ өвлүүлэх бодолтой юу?

Би охин Цахирмаадаа өвлүүлнэ гэсэн бодолтой явдаг. Миний охин ч энэ мэргэжилд илүү сонирхолтой байгаа.

Сантехникийн материалаа хаанаас оруулж ирдэг вэ?

Манайх Герман Хятадын хамтарсан компаниас сантехникийн материалаа оруулж ирдэг. Бид ер нь Европын стандарт хангасан материалуудаар ихэвчилэн хийдэг.

Манай барилгын салбарын өнөөгийн төрх ямар байна гэж та үзэж байна вэ?

Жил ирэх тусам шинэ шинэ барилгуудыг барьсаар байна. Тийм ч учраас чанартай сайн барилгуудыг барьж чадаж байна гэж би боддог. Та бүхэн ч гэсэн харж байгаа байхаа. Өнгө үзэмж дизайны хувьд дэвшилттэй байгаа.

Сүүлийн үед барилгын чанарын асуудал ихээр яригдах болсон. Тэгвэл бид нар барилгын чанарыг сайжруулахын тулд юуг хийх ёстой вэ?

Бид барилгынхаа явцын тал дээр их анхаарах ёстой. Манайхан ингэж чадахгүй байна. Хэрвээ энэ зүйл дээр анхаарлаа хандуулж чадвал манай барилгын чанар эрс нэмэгдэх болно.

Цаашдаа компаниа өргөжүүлэх тал дээр ямар арга хэмжээ авах гэж байна вэ?

Компаниа улам өргөжүүлж, Монголынхоо барилгын салбарт чанартай олон барилгыг барьж босгохыг зорьж байна. Мөн Солонгосын барилгын компанитай хамтарч томоохон барилгын угсралтын ажлыг хийхээр төлөвлөж байна.

Ингэхэд Нямаа захирлын бахархал юу вэ?

Би их үндэсэрхэг үзэлтэй хүн. Тийм ч учираас юуны түрүүнд сайхан Монгол орноороо их бахархадаг. Өөрийн эзэмшсэн мэргэжил, хийж бүтээсэн зүйлээрээ омогшиж явдаг юм.

Та бидэнтэй хэлэх дуртай үгээ хуваалцаач

Нэг л үгийг би хэлэх дуртай. Энэ бол сайн санаж явбал бүх зүйл бүтнэ гэсэн сайхан үг байгаа.

Та бид 2-ын ярилцлага өндөрлөж байна. Тэгэхээр Монголын барилгын салбарт ийм л зүйлийг хийчихвэл болж байна гэсэн таны бодол

Барилга гэдэг бол тухайн хотын өнгө үзэмж байдаг. Тийм учраас манай хотын төлөвлөгөөг сайн зохион байгуулах хэрэгтэй. Хуучин барилгуудын оронд шинэ шинэ өндөр барилга барих шаардлагатай. Энэ тал дээр л илүү анхаараасай.

Өөрийн бодол санаагаа надтай хуваалцсан танд их баярлалаа. Таны санасан сэдсэн бүх зүйл сэтгэлчилэн бүтэх болтугай.

Д.Нарантуяа
БАРИЛГА.мн