Монголын барилгын материалын бизнесийн хүрээнд өөрийн гэсэн байр сууриа олж чадсан нэгэн хүнтэй уншигч таныг уулзуулах гэж байна. Бизнесийн их ажлын хажуугаар Монголын  барилгын материал үйлдвэрлэгчдийн холбоо гэсэн том байгууллагыг удирдаж байгаа М.Түмэнжаргал гуайг урьж оролцуулж байна.

Танд энэ өдрийн мэнд хүргэе.
Баярлалаа. Юуны өмнө БАРИЛГА.мн сайтын хэрэглэгч та бүхэнд энэ өдрийн мэндийг айлтгаад дөнгөж саяхан болж өнгөрсөн улс тунхагласны баярын мэнд хүргэе.

Та манай сайтын уншигч нарт өөрийгөө танилцуулна уу?
Намайг Маадайн Түмэнжаргал гэдэг. Би 1989 онд ЗХУ-ын Одесс хотын Улс ардын аж ахуйн их сургуулийг материал техникийн хангамжийн эдийн засагч мэргэжлээр төгссөн. Тухайн үед материал хангамжийн ерөнхий хорооны нэр дээр явсан болохоор ч тэрүү барилгын хангамж, одоогийн Материалимпекс компанид хуваарилагдан очсон юм. Өнөөдрийг хүртэл уг компанидаа ажиллаж байна. Үүний хажуугаар “Гермес” барилгын материалын худалдааны төвийн захиралын албан тушаалыг хашиж байна.

Хэдэн хүүхэдтэй вэ? Гэр бүлийнхээ талаар танилцуулбал.
Би эхнэр 2 хүүхдийнхээ хамт амьдардаг. Эхнэр маань дунд сургуулийн англи хэлний багшийн мэргэжилээр ажилладаг. Хоёр охин минь 2-лаа дунд сургуулийн сурагчид. Том нь Ү-Цай Хятад хэлний гүнзгийрүүлсэн сургалттай сургуулийн 7-р анги, бага охин маань American school сургуулийн 4-р ангид тус тус сурдаг.

Ингэхэд та аль нутгийн хүн бэ?
Миний аав Дундговь аймгийн Адаацаг сумын хүн. Харин ээж маань Хөвсгөлийнх. Энэ хоёр маань нийслэл хотдоо танилцан улмаар гэр бүл болж манайг төрүүлсэн юм. Тийм ч учраас би нийслэл хотын унаган иргэн гэж хэлж болно.

Одоогоор та ямар ажил эрхэлж байна вэ?
Өөрийн хувийн бизнес эрхлэхийн хажуугаар Монголын барилгын материал үйлдвэрлэгчидийн холбооны ерөнхийлөгчөөр 3- дах жилдээ ажиллаж байна. Холбооныхоо үйл ажиллагааг өргөжүүлэх, гишүүн байгууллагуудынхаа үйл ажиллагааг дэмжих чиглэл дээр анхаарч ажилладаг.

Та анх сургууль төгсөж ирээд ямар байгууллагад ажиллаж байсан бэ?
Анх би Материалимпекс компаниас ажлын гараагаа эхэлж байсан. Тухайн үеийн ажлын дүрмийн дагуу сарын турш ачигч хийж байлаа. Мөн жил хагас туслах нярав хийж байгаад 2000-2004 онд гүйцэтгэх  захирал хийж  байгаад 2004-2007 онд ТУЗ албаны даргын ажлыг гүйцэтгэж байгаад саяхан ажлаа хүлээлгэж өгсөн.

Та бидэнд “Гермес” төвөө танилцуулаач
Манай “Гермес” төв нь 2005 оны 6-р сараас эхлэн үйл ажиллагаагаа явуулсан. Ашиглалтанд орсоноос хойш 50 гаруй хүнийг ажлын байраар хангахын зэрэгцээ барилгын материал, гэр ахуйн барааны худалдааны үйлчилгээ эрхлэгч 200 гаруй байгууллага, хувь хүмүүсийн ажил үйлчилгээ явуулах орчин үеийн барилгын материалын худалдааны  төв юм. Хүмүүс Монголын барилгын материалыг 100-н айлаар төсөөлж байсан бол одоо тийм биш. Барилгын материал заавал гадаа бохир орчинд байх албагүй. Гадаа хүйтэнд барилгын материал худалдаалснаар чанарт муу нөлөөлөхөөс гадна өнгө үзэмж, худалдан авагчын тав тухыг хангаагүй гээд олон хүндрэлтэй зүйлүүд байсан. Тэгвэл өнөөдөр энэ байдал өөрчлөгдөж хүмүүс тав тухтай, нэг доороос өөрт хэрэгцээтэй бүхий л материалаа манайхаас авах боломжтой юм. Барилга гэдэг бол хүний анхдагч 3-н хэрэгцээний нэг. Тиймээс бид энэ тал дээр илүү анхаарч хэсэг нөхдийн хамт энэ төвийг байгуулсан юм.

Түмэнжаргал гэдэг хүний хувьд нэг өдөр хэрхэн өнгөрдөг вэ?
Өглөө ажил дээрээ ирээд өглөөний ажил үүргийн хуваарийн дагуу шаардлагатай шийдвэрлэх асуудлаа хамт олонтойгоо цагийн дотор ярилцан шийдвэрлэдэг. Мөн үдээс хойш болохоос өмнө сонингоо гарчиглана. Үүний дараа интернетээр орж шуудан захиа ирсэн байна уу үгүй юу гэдгийг шалган хариу бичдэг. Энэ бүх зүйлүүд маань үдээс өмнө хийгддэг ажил юм. Харин үдээс хойшдоо уулзаж, зөвлөгөө зөвлөмж авахаас гадна цэвэр бизнесийн холбогдолтой хүмүүстэй уулздаг. Тэгээд орой нь маргаашийн ажлын төлөвлөгөө, өнөөдөр хийсэн ажлаа дүгнэнэ гээд ар араасаа давхацсан олон ажил байдаг. Энэ бүгдийн хажуугаар бас нийгмийн үйл ажиллагаанд идэвхтэй оролцдог.

Өөрийн бизнесээ хүүхдүүддээ өвлүүлэх үү?
Намайг багш нар, ангийхан маань бүгд л онц сурдаг юм чинь эрдэмтэн хүн болох байх гэдэг байсан. Гэтэл би зах зээлийн энэ нөхцөлд нэг л мэдэхэд бизнест хөл тавьчихсан байсан. Бидний үед нийгэм хүнд байсан гарцаагүй орохоос өөр арга байгаагүй. Гэтэл одоо бол өөр. Бүх зүйл чөлөөтэй болсон. Тэгэхлээр сонголтоо өөрсдөө хийх хэрэгтэй. Харин эцэг эх бидний зүгээс суурь хүмүүжлийг нь зөв олгох нь чухал гэж би боддог.

Хүн болгонд өөрийн гэсэн бахархал байдаг. Тэгвэл таны хувьд
Би Монголынхоо ард түмэн тэр дундаа эгэл жирийн малчдаараа бахархаж явдаг. Манайхан чинь их сайхан хүмүүс шүү.  Би хөдөө гадаа их явдаг. Үнэхээр ч амьдрал хүнд харагддаг. Хэцүү байгаа мөртлөө амьдрал болж байна, төр засаг маань харж байна гэж хэлэх тэдний үгийг сонсоод өөрийн эрхгүй бахархадаг. Гэтэл эрх мэдэлтэй хүмүүсийг харахад болохгүй, бүтэхгүй байна гээд байдаг. Бид чинь амны билэгтэй ард түмэн шүү дээ.

Бизнесээ өргөжүүлэх тал дээр ямар арга хэмжээ авах вэ?
Хүн болгонд өөрийн гэсэн мөрөөдөл байдаг. Бизнесийн гэхээсээ илүү энэ маань улс орондоо яаж туслах бол гэдгийг илүү боддог юм байна. Барилгын материалын үйлдвэрлэлийн  чиглэл дээр илүү анхаарч байгаа. Бид заавал барилгын  материалаа гадаадаас авах биш дотооддоо үйлдвэрлэхийг эрмэлзэж байна.

Мэргэжлийн хүний хувьд сүүлийн үеийн барилгын материалын чанарыг ямар байна гэж та үздэг вэ?
Би түрүүн хэлсэн. Барилга маань хүний 3-н хэрэглээний нэг. Гэтэл бид хүнсний аюулгүй байдал гэж их ярьдаг. Энэ бол буруу зүйл биш. Гэхдээ барилга бол хоол хүнстэй яг адил зүйл. Өнөөдөр бид тайван сууж л байна. Тэгэхэд Улаанбаатар газар хөдлөлийн идэвхитэй бүсэд байдаг хот. 5,6-н баллын газар хөдлөхөд хэдэн байшин нурах бол гэхээс би айж явдаг. Хэдэн зуу, хэдэн мянгаараа алга болно. Тийм ч учраас дүрэм стандарт, дэг журам  барилгад хатуу барих ёстой. Одоо бол ашиг нь давамгайлаад чанар нь дараа нь тавигдаад байна.

Ер нь барилга угсралтын чиглэл рүү орох бодол байна уу?
Өмнө нь хүмүүстэй хамтарч барилга барьж байсан. Гэхдээ энэ чиглэлээр дангаараа ажиллах бодол байхгүй ээ. Хүмүүс хамтарч ажиллах санал тавибал зарим нэг материал нийлүүлэхээс авахуулаад хамтарч болно.

Холбооны тэргүүний хувьд ямар ажил хийхээр төлөвлөж байна вэ?
Манай холбоо нь нийт барилгын материал үйлдвэрлэдэг 70 гаруй байгууллага, хувь хүмүүс, аж ахуй нэгжээс гадна Дарханы технологийн их сургууль, ШУТИС-ийн БИАС-тай байнга хамтарч ажилладаг. Бидний цаашдын хийхээр төлөвлөж байгаа зүйлийн нэг бол Монголын барилгын материалыг олон улсын зах зээл дээр гаргах төлөвлөгөөтэй ажиллаж байна.

“Гермес” төвтэй хамтарч ажиллаж байгаа аж ахуй нэгж, хувь хүмүүс барилгын материлаа хаанаас оруулж ирж байна вэ?
Барилгын материал нь өөрөө овор ихтэй үнэ багатай зүйл. Барилгын материалыг Америкаас, Германаас оруулж ирнэ гэдэг бараг байхгүй. Манай гол материалууд маань ОХУ, Хятадаас оруулж ирдэг. Сантехникийн материалаа Солонгос, Польш, Чех улсуудаас оруулж ирдэг.

Та бид 2-ын ярилцлага төгсөж байна. Сүүлийн боломжийг танд үлдээе.
Манайд барилгын материалын салбар их эрчимтэй хөгжиж байна. Үүнийг дагаад барилга барьдаггүй компани, барилгын материалын худалдаа хийдэггүй хүн гэж байхгүй байна. Энэ дээр бас анхаарах хэрэгтэй. Дараачийн асуудал бол боловсон хүчин. Жишээ нь гагнуурчин, мужаан, токарьчин, өрлөгчин шаварчин хүмүүс маань байхгүй боллоо. Энэ тал дээр манай холбоотой хамтарч ажиллаач гэж уриалж байна. Одоо л бэлтгэж эхлэхгүй бол оройтно. Боловсон хүчин байхгүй учраас Хятадуудыг оруулж ирж ажиллуулахаас өөр аргагүй байгаа. Зөвхөн барилга дээр ч биш бусад салбар дээр ч анхаарах хэрэгтэй. Ингэхгүй бол өнөөдөр дээд сургууль төгссөн хүн хар ажил хийхгүй. Тэгсэн хэрнээ мэргэжлийн ажил нь олддоггүй. Тэгэхээр мэргэжилгүй хүнтэй яг адил болчихож байгаа юм. Энэ тал дээр бид зайлшгүй анхаарах хэрэгтэй байна.

Өөрийн үзэл бодлоо надтай чөлөөтэй хуваалцсан танд их баярлалаа. Таны болоод танай хамт олны цаашдын ажилд чинь өндөр амжилт хүсье.

Д.Нарантуяа
БАРИЛГА.мн