Агаарын температур тэг градусаас доош заасан нөхцөлд барилгын бетон цутгах, төмөр бетон угсрахыг хоригложээ. Улсын мэргэжлийн хяналтын газрын дарга энэ оны нэгдүгээр сарын 26-нд ийм шийдвэр гаргасан ч хэрэгжихгүй байгаа аж. Тус газрын байцаагч нар Улаанбаатар хотод барилга барьж буй компаниудыг энэ сарын 9-нд шалгахад 120 гаруй компани дээрх шийдвэрийг зөрчин, барилгын бетон цутгаж байжээ. Тэдний барилга угсрах ажлыг зогсоосон байна.

Барилгын компаниуд хүйтэн нөхцөлд бетон зуурмагаа хөлдөөхгүй байх арга хэмжээ авдаггүй, 24 цагийн турш харуул хамгаалалттай байлгадаггүй, цахилгааны эх үүсвэр нь найдваргүй, трансформатор нь эвдэрсэн, бетоныг дулаан материалаар хучдаггүй зэрэг зөрчил гаргажээ. Үүний улмаас хөл муутай яажгий сандал шиг барилга босч байна.

Барилгын талбай дээр өвөл зуурмаг бэлтгэн, даацын бүтээц цутгахад уг зуурмаг бэхжиж амжилгүй хөлддөг байна. Ингэж хөлдсөн бетон хавар гэсэхдээ үнс шиг бутран унадаг тухай мэргэжлийн хяналтын байцаагч сэрэмжлүүллээ, Шалгалтаар ийм зөрчил олонтаа илэрч байжээ. Бетоныг бутлах шаардлага тавихад барилгачид түүнийгээ нуухын тулд барилгаа аль болохоор хурдан барьж, гадуур нь хавтангаар хучих, шавардах зэргээр далдалдаг аж. Ийм барилга газар чичирхийлэх төдийд л нурах аюултай. Тиймээс Улсын мэргэжлийн хяналтын газраас дөрөвдүгээр сар хүртэл бетон цутгахыг зогсоолоо. Мөн барилгыг шөнийн  цагаар угсрахыг хориглов. Тодруулбал, 22-06 цагийн хооронд тоосго, блок өрөх, арматур болон барилгын бусад материал угсрахгүй боллоо.

TODAY