Замын-Үүд дэх төмөр замын шилжүүлэн ачих анги ачаандаа дарагдаж энэ сарын 3-аас тэнд ачааны бөөгнөрөл үүсчээ. Үүнээс үүдэн ачаа илгээгч нар буюу төмөр замаар үйлчлүүлэгчид эсэргүүцэл үзүүлэх түр хороо байгуулсан байна.

Энэ талаар Улаанбаатар төмөр замын Ачаа тээврийн албаны дарга Б.Лхагвасүрэнгээс тодруулав.

-Замын-Үүдийн боомтоор орж ирж байгаа зарим ачааны овор хэтэрхий бага байгаагаас энэ бөөгнөрөл үүсээд байна. Ялангуяа барилгын материал, тэр дундаа цементийг 25-50 кг-аар савлан оруулж ирж байгаа нь том оврын өргөгч кранаар ачиж буулгахад олон цаг зарцуулж байна. Бидний зүгээс үйлчлүүлэгч нартаа 500 кг-аас дээш хэмжээний савалгаатай оруулж ирж байхыг санал болгосон. Гэтэл тэд жагсаал зохион байгуулж, хүнд даацын машинуудаар зам хаах зэргээр эсэргүүцэж байна. Тиймээс тэдэнтэй уулзаж тохиролцсоны үндсэн дээр ачилт, буулгалтын тарифыг нэмж, хүч бололцоогоо дайчлан богино хугацаанд бөөгнөрөл арилгахаар болсон.