Барилга МН

Агаарын бохирдлыг бууруулахад иргэн бүрийн оролцоо чухал. Тиймээс бидэнтэй иргэд энэ талаар санал бодлоо хуваалцлаа.

Хан-Уул дүүргийн өндөр настан Т.Лхамжав:
Дүн өвөлдөө амны хаалтгүйгээр явахын аргагүй болоод байна
-Ард иргэдийн амьдрал ядуу байна. Тиймээс хүн болгон утаа гаргахгүй түлшийг түлээд байх боломжгүй байгаа. Тэгээд ч хэзээнээсээ мод нүүрсээ түлээд сурчихсан юм чинь яах билээ. Гэр хорооллын бүх айлуудыг нэгдсэн журмаар төр засгаас цахилгаан халаагуураар халдаг системд холбоод өгчихвөл болж л байна. Тэгэхгүй хий л яриад байх юм. Гудамжаар ялангуяа өглөө, орой амны хаалт зүүж явахгүй л бол хөгшин бидний цээж гашуун оргиод хар аяндаа бөгшүүлж ханиалгаад байх юм. Дарга нар маань гаднаас зөндөө л туршлага судалж яваа байлгүй. Түүнийгээ хэрэгжүүлээсэй. Одоо төлөвлөлт хийгдэж орон сууцжуулна гэж яриад байна. Иргэдээ хүндрүүлэхгүйгээр зээлээ хангалттай өгөөд орон сууцанд хамруулах хэрэгтэй.

Баянгол дүүрэг 11 дүгээр хорооны иргэн Н.Мөнхдалай:
Дулаараад ирэхээр агаарын бохирдол мартагддаг шүү дээ
-Ер нь утаа их байна. Ялангуяа өглөө оройд. Гэхдээ утаанаас гарахад хол байна даа. Гэр хороолол нь нэмэгдээд байна. Харин цахилгаан зуух тавина гэж яриад байгаа түүнийг хэрэгжүүлбэл багасаж магадгүй. Төр засгаас ч багагүй л санаа зовж байх шиг байх юм. Энэ жил мэр сэр арга хэмжээ авлаа. Одоо ингээд дулаарчихлаар нэг хэсэгтээ л мартчихна шүү дээ. Дахиад л өвөл болохын түрүүчээр ярина тэглээ гээд ямар ч шийдэлд хүрэхгүй нь ойлгомжтой.