Барилга МН

ТЭХЯ-ны нээлттэй хаалганы өдрөөр Дулааны шугам сүлжээнийхэн хэмээх газар доор бүтээн байгуулалт хийдэг энэ их айлын үйл ажиллагаатай танилцлаа.

Сүүлийн жилүүдэд төвлөрсөн дулаанд холбогдох барилга объектын тоо нэмэгдсээр байгаа. Тодруулбал дулааны шугамд холбогдсон байгууллагуудын тоо жилд дунджаар 13 хувиар өссөн аж. Тиймээс Дулааны шугам сүлжээний газар 2007 оны 10 дугаар сараас шинээр баригдах барилгуудад техникийн нөхцөл олгохоо түр зогсоогоод байгаа гэнэ. Барилга шинээр сүндэрлэхийн хэрээр дулааны ачаалал ихэсч 2006 онд 61 хувь, 2007 онд 80 хувиар өссөн байх юм. Төвлөрсөн дулаан хангамжинд шинээр холбогдох техникийн нөхцөлтэй барилгуудад Москва хороолол, 3,4,10,12,13 дугаар хороололд баригдаж буй орон сууцнууд орсон юм байна.

Дулааны сүлжээн доорх чимээгүй хот өнөөдрийн байдлаар 2010 он хүртэл ажиллах дулааны нөөцтэй юм байна. Харин дулаан тав дахь эх үүсвэр байгуулагдвал хүндрэлээсээ гарах гэнэ. Одоо ажиллагаатай байгаа дулааны шугамын ихэнхи хуучирсан бөгөөд ашиглах хугацаа хэдийнэ хэтэрчээ. Гэр хорооллынхон халуун усанд орохдоо 1500 төгрөг төлдөг бол байрныхан халуун усныхаа төлбөрт сард ердөө 620 төгрөг төлдөг юм байна. Харин энэ мөнгийг сард 1500 төгрөг болговол 1.8 тэрбум төгрөгийн ашиг олж шугамын засвар хийгээд байх боломжтой аж. дулааны шугам сүлжээнийхэн жилд 1.4 тэрбум төгрөгийг шугам засахдаа зарцуулдаг юм байна. Энэ мөнгө хаанаа ч хүрэхгүй бөгөөд хоёр км шугам шинэчилэхэд   5.4 тэрбум төгрөг зарцуулдаг аж. Харин 40 мянган айлын орон сууц хөтөлбөр хэрэгжиж буй тул ирэх жил тав, дараагийн жил нь зургаан тэрбум төгрөгөөр шугам барих болжээ. Тиймээс ДЦС-V-ийг яаралтай барих шаардлагатай байгаа бөгөөд нийслэлийн зүүн хэсэгт байгуулахаар төлөвлөжээ.