Улирч буй 2009 оныг Монгол Улсын Засгийн газар “Үйлдвэржилтийн жил” болгон зарласан нь үндэсний үйлдвэрлэл хөгжихөд үр дүн өгчээ.

 

Гэхдээ алдаа дутагдал ч багагүй байгаа бөгөөд цаашид засч залруулан, эхлүүлсэн ажлыг үргэлжлүүлэх нь зүйтэй гэж үзэж байна. Тэргүүн шадар сайд Н.Алтанхуягаар ахлуулсан “Үйлдвэржүүлэлтийг дэмжих жилийн ажлыг зохион байгуулах, хяналт тавих үүрэг бүхий” ажлын хэсэг өчигдөр хуралдахдаа ийн дүгнэлээ. Үйлдвэржилтийн жилийн хүрээнд “Монгол Улсыг үйлдвэржүүлэх хөтөлбөр”-тэй болж, Жижиг, дунд үйлдвэрийн үйлдвэрлэлийн зориулалттай тоног төхөөрөмж, сэлбэг хэрэгслийг гаалийн болон нэмэгдсэн өртгийн албан татвараас чөлөөлөх тухай хууль батлагджээ.

 

Мөн Орон нутагт үйлдвэрлэл хөгжүүлэх чиглэл, Үйлдвэр технологийн паркын тухай хууль, Хоршоог хөгжүүлэх нийгмийн хэмжээний хөтөлбөр зэрэг эрхзүйн томоохон баримт бичигтэй болж, энэ чиглэлд урьд нь улсын төсөвт нэг тэрбум төгрөг төсөвлөдөг байснаа 2009 онд 30 тэрбум болж нэмэгдэн, аймаг бүрт хүрэлцсэн байна. Тэрхүү хөрөнгөнөөс 1559 аж ахуйн нэгж, иргэдэд зээл олгон санхүүгийн дэмжлэг үзүүлсний үр дүнд 397 үйлдвэр шинээр байгуулагдаж, 1162 жижиг дунд үйлдвэр үйл ажиллагаагаа өргөтгөж, нийтдээ 5500 гаруй ажлын байр шинээр нэмэгджээ. “Үйлдвэржүүлэлтийн жил” нэг жилийн хугацаатай зарлагдсан ч ингээд дуусаж байгаа биш юм. Цаашид зээлийн баталгааны сан байгуулах, лизингийн үйлчилгээг нэвтрүүлэх зэрэг арга хэмжээ авч ажиллах шаардлагатай байгааг Тэргүүн Шадар сайд Н.Алтанхуяг онцоллоо.