Монгол Улсын шинэ Засгийн газар байгуулагдсанаас хойш 100 хоногт Барилга, хот байгуулалтын яам Засгийн газрын 2004-2008 оны үйл ажиллаганы хөтөлбөрийн хүрээнд 2008 оны нийгэм, эдийн засгийг хөгжүүлэх үндсэн чиглэл, төсвийн хөрөнгө оруулалтын гүйцэтгэлийг хангах зохион байгуулалтын арга хэмжээний төлөвлөгөө гарган ажиллав. Түүнчлэн төрийн албаны үйл ажиллагааг төгөлдөржүүлж сахилга хариуцлагыг дээшлүүлэх, төрийн үйлчилгээг хөнгөн шуурхай болгох, хүнд суртлыг арилгах, үндэсний барилгачид, үйлдвэрлэгчид, хөрөнгө оруулагчдыг дэмжих чиглэл баримтлан ажиллаж байна.

       Улсын хэмжээнд нийтлэг мөрдөгдөж байсан эрхийн акт, баримт бичгийн талаар аж ахуйн нэгж, байгууллага, иргэдээс тавьсан санал хүсэлтийг судалж, хүнд суртал, чирэгдэлгүй болгох, зорилгоор   өмнө гарсан 14 тушаал, шийдвэрийг хүчингүй болгов.

       Бизнес эрхлэгчид, хөрөнгө оруулагчид, иргэдэд төрийн үйлчилгээг нээлттэй, ил тод байлгах зорилгоор сар бүр “Нээлттэй хаалганы өдөр” –ийг зохион байгуулж байна. 3 дугаар сарын 14 –нд “Барилгын салбарын удирдах ажилтны зөвлөгөөний үеэр салбарын хэмжээнд “нээлттэй өдөр”, “үзэсгэлэн”- г зохион байгуулна.

2008 оны төсвийн хөрөнгө оруулалтаар БХБ-сайдын багцад тусгагдсан төсөл, арга хэмжээг цаг хугацаанд нь орон нутагт хэрэгжүүлэх үүднээс аймгийн Засаг дарга нартай бүтээгдэхүүн нийлүүлэх Гэрээ байгуулан ажиллаж байна.

     Тус салбарын эрх зүйн орчинг боловсронгуй болгох чиглэлээр “Барилгын тухай” хуулийг УИХ-аар батлуулж, түүнийг хэрэгжүүлэхтэй уялдсан 10 гаруй дүрэм, журмыг боловсруулав.

         Эдгээр дүрэм, журмыг баталгаажуулж мөрдүүлснээр барилгын үйл ажиллагаа эрхлэх байгууллага, аж ахуйн нэгжүүдэд тусгай зөвшөөрөл олгох, барилгын ажлыг эхлүүлэх, ашиглалтанд хүлээн авдаг   олон шат дамжлага бүхий хуучин ажиллагааг цөөлж нэг цэгийн үйлчилгээнд шилжүүлж, хялбаршуулснаас гадна хариуцлагыг өндөржүүлсэн   шинэ тогтолцоонд шилжих юм.

 “ Хүн амыг орон сууцаар хангах, барилгын салбарт ажлын байр нэмэгдүүлэх хөтөлбөр”-ийг УИХ-д өргөн барьлаа.

        Орон сууц барих ажлыг эрчимжүүлж, хөрөнгө оруулагчдад хөнгөлөлт үзүүлэх, орон нутгийн эрдэс түүхий эдэд тулгуурласан барилгын материалын үйлдвэрлэлийг нэмэгдүүлэх, үнийн өсөлтийг сааруулах   зорилгоор “Барилгын материалын зарим үйлдвэрийн тоног төхөөрөмжийг гаалийн болон нэмэгдсэн өртгийн албан татвараас чөлөөлөх тухай” хуулийн үзэл баримтлалыг боловсруулж Хууль зүй, дотоод хэргийн яам, Сангийн яамтай тохиролцон Засгийн газарт оруулахаар бэлтгэж байна. 

      Барилга, хот байгуулалтын сайдын 2007 оны 210 тоот тушаалаар барилгын ажилчдын тарифт цалингийн жишгийг 90 хувиар нэмэгдүүлэхээр шийдвэрлэсэн бөгөөд барилгын ажилчдын дундаж цалингийн хэмжээ өнгөрсөн оны мөн үетэй харьцуулахад 50-60 хувиар нэмэгдэнэ. Үүний үр дүнд салбарын хэмжээнд үндэсний барилгачдын эзлэх хувийг нэмэгдүүлэх, тэдний нийгмийн асуудлыг шийдвэрлэх, тогтвор суурьшилтай ажиллуулах бололцоог бий болгоно. 

        “40 000 орон сууц” хөтөлбөрийг санхүүжүүлэх журам “ –ыг Сангийн сайд, Барилга, хот байгуулалтын сайдын хамтарсан тушаалаар баталж хөтөлбөрийн санхүүжилтийг саатуулахгүй байх арга хэмжээ авч орон нутагт баригдаж байгаа орон сууцны барилгын гүйцэтгэлд 4,2 тэрбум төгрөгийн санхүүжилт хийлээ.

         Засгийн газрын бондын   хөрөнгийн эх үүсвэрээр орон сууцны урт хугацааны хөнгөлттэй зээл олгох ажлыг эхлүүлж, 150 гаруй иргэдийн хүсэлтийг хүлээн авлаа. Ойрын үед арилжааны 5 банкаар дамжуулж зээл олгоно.

       “Хот, суурин газрын ус хангамж, ариутгах татуургын ашиглалтын тухай “ “Орон сууцны тухай” хуульд өөрчлөлт оруулах тухай хуулийн төслийг боловсрууллаа.

     “Нийтийн аж ахуйн үйлчилгээний салбарыг хувьчлах 2 үе шатны хөтөлбөр”, “Сум, суурин газрын дулаан хангамжийн шинэчилсэн хөтөлбөр боловсруулж Засгийн газарт оруулав. Эдгээр хөтөлбөр нь нийтийн аж ахуйн үйлчилгээний салбарын бүтэц зохион байгуулалтыг зах зээлийн нөхцөл шаардлагад нийцүүлэн боловсронгуй болгох сум суурингийн дулаан хангамжийг сайжруулахад чиглэгдэж байна.

   ”Төрийн албан хаагчдыг орон сууцаар хангах дэд хөтөлбөр”-ийн хүрээнд “Төрийн албан хаагчдад хөнгөлөлт үзүүлэх журам”- ыг боловсруулж   ХЗДХЯ-тай хамтран батлахад бэлэн болгов.

    Энэхүү зуун хоногт 45 барилга, түүний дотор 1143 айлын орон сууцны 23 барилгыг улсын комисс хүлээн авч байнгын ашиглалтанд орууллаа.

 Улаанбаатар хотын агаарын бохирдлыг багасгах, гэр хорооллыг орон сууцны хороолол болгон хөгжүүлэхэд чиглэсэн бодлого боловсруулж хэрэгжүүлэх ажлыг санаачилж шийдвэрлүүлэв. Нийслэлийн 20 орчим гэр хороололд дахин төлөвлөлт хийж Засгийн газрын ажлын хэсгийн хуралдаанаар хэлэлцүүлэв. Тухайлбал: Эхний ээлжинд “14 , 7, радио телевизийн орчны хороолол”, дараагийн ээлжинд “Зүүн сэлбэ, Гандан, Дарь-эх, Дэнжийн 1000, 7 дугаар бичил хорооллыг хамруулах болно. Эдгээрийг хэрэгжүүлэхэд ойролцоогоор 100 гаруй тэрбум төгрөгийн хөрөнгө шаардагдаж байна.

    Засгийн газрын үйл ажиллагааны хөтөлбөрт тусгагдсан Нийслэлд оюутны хотхон байгуулах техник эдийн засгийн үндэслэл, ерөнхий төлөвлөгөөний төслийн саналыг   боловсруулан дуусгаж Буянт –Ухаад 60 га газрыг олгуулах шийдвэр гаргуулав. Энэ хөтөлбөрийг хэрэгжүүлэхэд шаардагдах хөрөнгийг 2008 оны төсөвт тусгаж, гүйцэтгэгчийг сонгон шалгаруулах тендрийн хороог байгуулаад байна.

     “Цагаан нуур”, “Замын - Үүдийн чөлөөт бүс” – ийн хөгжлийн ерөнхий төлөвлөгөө, Говийн бүсийн Таван толгой, Оюу толгой, Цагаан суврагын орд газрыг түшиглэсэн бүсийн хөгжлийн стратеги, хот байгуулалтын ерөнхий төлөвлөгөөг боловсруулах ажлыг хийж дуусгав.

       “Геодези, зураг зүйн тухай” хуулийн шинэчилсэн найруулгын төслийг УИХ –д өргөн барьж хэлэлцүүлж байна

    “Газар өмчлүүлэх, эзэмшүүлэх, ашиглуулах эрхийн дуудлага худалдаа явуулах журам”, “ Газар эзэмшүүлэх эрхийн төсөл сонгон шалгаруулах журам”,”Газар эзэмших, ашиглах эрхийн гэрчилгээ олгох,бусдад шилжүүлэх гэрчилгээний хугацааг сунгуулахад төлөх хураамжийн хэмжээг тогтоох тухай”   журмын төслүүдийг боловсруулан Засгийн газарт оруулаад байна. Дээрх журмууд батлагдсанаар газрын харилцааны үйл ажиллагаа нээлттэй ил тод явагдах, эзэмшил, ашиглалтад байгаа газруудад зах зээлийн эрэлт хэрэгцээнд нийцүүлсэн төлбөр, хураамжийг бодитой тогтоох юм.

   “ Монгол улсын иргэнд газар өмчлүүлэх тухай” “ Монгол улсын иргэнд газар өмчлүүлэх тухай хуулийг дагаж мөрдөх журмын тухай” хуулиудад иргэд ,гэр бүлийн хэрэгцээнд   үнэгүй газар өмчлүүлэх хугацааг 5 жилээр сунгах саналыг УИХ –д өргөн барихаар боллоо.

     Мянганы сорилын сангийн хөрөнгөөр хэрэгжих ” Хөрөнгийн эрхийн бүртгэл” төслийн хүрээнд хийгдэх ажлын төлөвлөгөөг батлуулав. “Эд хөрөнгийн эрхийн улсын бүртгэлийн тухай” хууль болон “ Хөрөнгийн үнэлгээний үйл ажиллагааны тухай” хуулиудад өөрчлөлт оруулах хуулийн төслийн үзэл баримтлалыг ХЗДХЯ-тай хамтран боловсруулав.

     “Бүртгэлийн нэгдсэн тогтолцоог бүрдүүлэх үндэсний хөтөлбөр”-т орон зайн дэд бүтэц “Цахим газар” –ыг боловсруулах боллоо.   

     Шинэ засгийн газрын ажиллах хугацаанд улсын хэмжээгээр 14 990 өрх, гэр бүл 1630,3 га газрыг өмчилж, 143 иргэн 1629,5 га газрыг аж ахуйн зориулалтаар худалдан авчээ.

БАРИЛГА, ХОТ БАЙГУУЛАЛТЫН ЯАМ