Нийслэлийн Иргэдийн төлөөлөгчдийн хурлын Тэргүүлэгчдийн хуралдаан өчигдөр болж нийт зургаан асуудлыг хэлэлцсэн.

Нийслэлийн Ерөнхий архитектор Н.Нацагдорж нийслэлийн орон сууцны фонд бүрдүүлэх журам батлах тухай асуудлыг хэлэлцүүлсэн юм. Нийслэлийн хэмжээнд орон сууц хүссэн маш олон иргэн байдаг. Нийслэлийн төр захиргааны байгууллага орон сууц хүссэн өргөдлүүдэд дарагдаад байгаа. Гэтэл хувийн хэвшлийнхэн төрийн өмчийн газарт, төрийн хөрөнгөөр хийгдсэн инженерийн шугам сүлжээг ашиглаад орон сууц барьж байна. Тиймээс төсвийн мөнгөөр хийгдсэн инженерийн шугам сүлжээ, төрийн өмчид байгаа газрыг ашиглан барилга барьж байгаа аж ахуйн нэгжүүдээс тодорхой хувийг нь авч орон сууцны фонд бүрдүүлэх журам зайлшгүй байх ёстой. Ингэхдээ нийт өртгийн хоёр хувийг нь үнэгүй олгохыг Тэргүүлэгчид санал нэгтэй дэмжсэн.  Энэхүү асуудал дээр ажил хэрэгч зарчмын саналууд давамгайлан гарч ирж байлаа. Юуны түрүүнд баригдах барилгаас хамгийн түрүүнд төрийн албан хаагчдад олгох, эсэх асуудал дээр Тэргүүлэгчид нэлээд  маргаан үүсгэж байлаа.

Цаашид орон сууцны хуваарилалтын журам гаргаж,  тодорхой болгоно гэж Улаанбаатар хотын Ерөнхий архитекторч тайлбарласан. Мөн нийслэлд хоршоо хөгжүүлэх дэд хөтөлбөр батлах тухай асуудлыг Хүнс, хөдөө аж ахуйн газрын дарга Р.Зоригт танилцуулав. Дэд хөтөлбөрт шилдэг хоршоог шалгаруулан бусад улс орны ижил төстэй хоршоодтой харилцаа холбоо тогтоох нөхцөлийг бүрдүүлэх улмаар ажилгүй иргэдийг хоршооны үйл ажиллагаа эрхлэх мэргэжлийн сургалтад хамруулна зэрэг хэд хэдэн зорилтыг хэрэгжүүлэхээр төлөвлөжээ. Тиймээс уг асуудлыг Тэргүүлэгчид баталсан юм.

Орон нутгийн өмчид хөрөнгө бүртгэн авах буюу хөрөнгө шилжүүлэх асуудлыг нийслэлийн Өмчийн харилцааны газрын дэд дарга танилцуулсан бөгөөд Тэргүүлэгчид санал бодлоо хэлэлцсэний үндсэн дээр баталсан. Түүнчлэн гэмт хэргээс урьдчилан сэргийлэх ажлыг зохицуулах зөвлөлийн 2008 оны төлөвлөгөөг батлах асуудлыг нийслэлийн Иргэдийн төлөөлөгчдийн хурлын Тэргүүлэгчдийн нарийн бичгийн дарга П.Хангал танилцууллаа. Эцэст нь нийслэлд Архивын байгууллага байгуулагдсаны 50 жилийн ой, Сонгинохайрхан дүүргийн есдүгээр сургуулийн ой тэмдэглэх зөвшөөрөл олгох асуудлыг хэлэлцсэн бөгөөд Тэргүүлэгчид санал нэгтэйгээр баталсан юм.

Улаанбаатар Таймс