Үндэсний бүтээмжийн 2007 оны шагналыг "Эрдэнэт" уулын баяжуулах үйлдвэр, Дарханы ДЦС төрийн өмчит хувьцаат компани, П.Н.Шастиний нэрэмжит төв эмнэлэг, Голомт банк, "Шинэ барилга" ХХК, "Зохиомж " дээд сургууль гэсэн зургаан байгууллага хүртжээ.

                Улс орныхоо хөгжлийг түргэтгэх, өрсөлдөх чадвар, нэр хүндийг дээшлүүлэх, ажил үйлчилгээний бүтээмжийн дэвшилтэт үзэл санааг хэрэгжүүлж, цаашид өсөн дэвжихийн үндсийг бэхжүүлсэн амжилтыг нь үнэлж олгосон энэ шагналыг Ерөнхийлөгч Н.Энхбаяр өнөөдөр гардууллаа. Энэ жилийн шагналт байгууллагуудын онцлог нь "Эрдэнэт" уулын баяжуулах үйлдвэр, Дарханы ДЦС төрийн өмчит хувьцаат компани бүтээмжийн цогц хөтөлбөрийг хэрэгжүүлж тодорхой үр дүнд хүрсэн бол, Голомт банк хоёр дахь удаагаа, П.Н.Шастиний нэрэмжит төв эмнэлэг эрүүл мэндийн салбараас анх удаагаа хүртэж байгаа аж.

Ерөнхийлөгч 1999 онд зарлиг гарган Үндэсний бүтээмжийн шагналыг бий болгосноос хойш дээрх зургаатай нийлээд 44 байгууллага энэ шагналыг аваад байна. Бүтээмж, чанарыг дээшлүүлэхэд санаачилга гарган ажиллаж байгаа арван байгууллага жил бүр эл шагналд нэрээ дэвшүүлдэг бөгөөд танилцуулга, шалгуур үзүүлэлтүүдийн дагуу бэлтгэж ирүүлсэн илтгэл, үнэлэгчдийн хорооны гишүүдийн байгууллага дээр нь очиж танилцаж гаргасан дүгнэлт, хяналтын хорооны зөвшөөрлийн үндсэн дээр 5-6 байгууллагад олгодог ажээ.  

МОНЦАМЭ