Барилга, хот байгуулалтын сайд Ц.Цолмон Ази, Номхон далайн бүсийн Бээжин дэх суурин төлөөлөгчийн газрын тэргүүн Бюго Фэвирийг хүлээн авч уулзав. Энэ нь тус яамны удирдлагатай уулзаж байгаа хоёр дахь уулзалт бөгөөд тун сонирхолтой сэдвийг хөндсөн юм.

Хиймэл дагуулын аргаар сансрын мэдээллийг хүлээн авах станцыг байгуулах нь Монгол орны хувьд тун чухал. Үүнд түшиглэн хот, бүсийг төлөвлөх, кадастрын зураг хийх, геологи хайгуулын ажил, батлан хамгаалахын чиглэлээр ч ажиллаж болох юм гэдгийг тэрбээр хөндөж ярилаа.

Урьд нь геологи хайгуулын чиглэлд сансрын мэдээллийг хэрхэн ашиглаж болох арга замыг судлан төслөө амжилттай дуусгаж байсан аж. Азийн болон дэлхийн олон орон дээрх аргыг өргөн хүрээнд ашиглаж байгааг дурьдахдаа тэрбээр зарим орон газар эзэмшүүлэх, өмчлүүлэх, газрын татвараа авахад ч сансрын мэдээллийг ашигладаг болсныг дуулгав.

Сайд Ц.Цолмон ноён Бюго Фэвирыг манай оронд дахин айлчилж, тус яамтай хамтран ажиллах болсонд талархаад, бүхий л талын дэмжлэг туслалцаа үзүүлэхэд бэлэн байгаагаа илэрхийлэв.