УИХ-ын дарга Д.Дэмбэрэл энэ оны 11 дүгээр сарын сүүлчээр нийслэлийн Багануур, Налайх дүүрэг дэх нүүрсний зарим уурхай, Улаанбаатар хотын дөрөвдүгээр цахилгаан станц, цахилгаан дамжуулах шугам сүлжээ зэрэг байгууллагуудын өвөлжилтийн бэлтгэл ажилтай танилцаж, түлш, эрчим хүчний салбарын тулгамдсан асуудлыг хэрхэн шийдвэрлэх талаар салбарын удирдлагуудтай санал солилцон тодорхой чиглэл өгсөн билээ.

Мөн тус салбарт тулгамдсан асуудал, түүний дотор эрчим хүчний салбарын стратегийн түүхий эд болох нүүрсний үнэ, нүүрс экспортлох боломжийн талаар УИХ-ын Тамгын газраас эрхлэн УИХ-ын гишүүд салбарын удирдлагууд, мэргэжилтнүүдийг оролцуулсан санал солилцох уулзалтыг Төрийн ордонд зохион байгуулсан.

Энэ  бүхэнтэй  уялдуулан УИХ-ын дарга Д.Дэмбэрэл энэ сарын 22-ны өдөр захирамж гаргаж, түлш, эрчим хүчний салбарын санхүү, эдийн засгийн чадавхийг сайжруулах, эрх зүйн орчныг боловсронгуй болгох чиглэлээр холбогдох бодлогын баримт бичгийн төсөл боловсруулах үүрэг бүхий Ажлын хэсгийг УИХ-ын гишүүн А.Тлейханаар ахлуулан байгууллаа.

Ажлын хэсгийн бүрэлдэхүүнд УИХ-ын гишүүн Б.Батбаяр, Н.Батбаяр, Ц.Баярсайхан, Х.Бадамсүрэн, Ц.Даваасүрэн, Д.Дамба-Очир, Д.Тэрбишдагва, Ц.Цэнгэл, Ц.Шинэбаяр, З.Энхболд нар оржээ.
Түлш, эрчим хүчний салбарын тулгамдсан асуудалтай холбогдсон энэхүү баримт бичгийг Мянганы хөгжлийн зорилтод суурилсан Үндэсний хөгжлийн цогц бодлого, “Эрчим хүчний нэгдсэн систем” хөтөлбөртэй уялдуулан боловс-руулж 2010 оны дөрөвдүгээр сарын нэгний дотор танилцуулахыг Ажлын хэсэгт даалгасан байна.