"Монинжбар" ХК-ийн "Бүтээн байгуулалт" бондыг өнөөдрөөс эхлэн Монголын хөрөнгийн бирж дээр арилжаалж эхэлнэ. Бондын нэг бүрийн үнэ 10 мянган төгрөг, нийт 120 мянган ширхэг, жилийн 11.11 хувийн хүүтэй юм.

"Монинжбар" ХК техник, төхөөрөмжөө шинэчлэх зорилгоор бонд гаргаж байгаа ажээ. Тус компани хот, хөдөөд иргэний болон нийтийн ахуй үйлчилгээний барилга, халаалтын зуух, дулааны болон цэвэр, бохир усны шугамын барилга угсралт, нийтийн төвлөрсөн инженерийн байгууламж барьдаг. Тус компани 2005 онд мөн "Бүтээн байгуулалт" нэртэй бонд гаргаж олсон хөрөнгөөрөө технологийн шинэчлэл хийсэн байна. Түүний үр дүнд манай бүтээгдэхүүний борлуулалт найм дахин өссөн гэж компанийн гүйцэтгэх захирал Б.Баярсайхан хэллээ. Өнгөрсөн жил нэг бүр нь 100 төгрөгийн нэрлэсэн үнэтэй 10 сая ширхэг хувьцаа гаргасан юм.

Бондыг арилжаалах гэрээнд МХБ-ийн гүйцэтгэх захирал Р.Содхүү, "Монинжбар"ХК-ийн гүйцэтгэх захирал Б.Баярсайхан нар гарын үсэг зурсан байна.

МОНЦАМЭ