Нийслэлийн бүтээн байгуулалтын төсөл хөтөлбөрүүдэд Монголын үндэсний барилга угсралтын болон барилгын материалын аж ахуйн нэгжүүдийг түлхүү оруулж тэднийг аж ахуйн зохион байгуулалтын хувьд бэхжүүлэх, өрсөлдөх чадварыг нэмэгдүүлэхэд дэмжлэг үзүүлэхийг Монголын барилгын үндэсний ассоциацийнхан Нийслэлийн Засаг дарга бөгөөд Улаанбаатар хотын Захирагч Г.Мөнхбаяртай өнөөдөр уулзалт хийхдээ хүслээ. Засаг дарга “Нийслэлд хийж буй гол гол ажлуудыг манай үндэсний компаниуд гүйцэтгэдэг. Бид ч ийм бодлого барьдаг, бидэнд ийм туршлага байна” гэсэн хариу хэлсэн юм.

 

Монголын барилгын салбарын 500 гаруй компани, барилгын материалын 250 үйлдвэр, зураг төслийн 290 компани, 36 төрийн бус байгууллагыг нэгтгэсэн тус ассоциацийн дэд ерөнхийлөгч Б.Батболд “Үндэсний компаниудаа дэмжих, ажлын байр бий болгох, хууль эрх зүйн тогтолцоог сайжруулах талаар хамтрах хүсэлтээ танд уламжилж байна.

 

Сүүлийн үед хот бидний ажиллах орчин, нөхцөлд анхаарч, чирэгдэл, хүнд суртал байхгүй болсныг энд зориуд онцолъё” гэсэн юм.   Мөн тэд хот төлөвлөлийн бодлогод экологийн тэнцвэрийг хадгалах, нийслэлчүүдийг богино хугацаанд орон сууцаар хангах, орон сууцжуулах бодлогыг хамтран хэрэгжүүлэх саналаа хүргүүллээ.

Засаг дарга уулзалтын төгсгөлд “Хот төлөвлөлтийн бодлогыг хэрэгжүүлэх хуулийн хүрээнд хамтран ажиллая, ажлын төлөвлөгөөгөө гаргаж, санамж бичиг байгуулья, орон сууцны үнийг бууруулах саналыг дэмжиж байна. Та бүхний тавьсан саналууд бүгд ойрын зорилтод тусгагдсан байгаа. Бага орлоготой иргэдэд хандсан хямд өртөгтэй түрээсийн орон сууцыг Сүхбаатар дүүргийн VII хороололд шинэ оноос барьж эхлэх гэж буй. Мөн давхар замын ажлууд ч эхэлнэ. Эдгээрт болоод гадаадын хөрөнгө оруулалттай төсөл хөтөлбөрүүдэд үндэсний компаниудаа оролцуулна. Бид та бүхнийг мэдээллээр хангана. Нийслэлийн Барилга хот байгуулалт, төлөвлөлтийн газрын дэргэд хотын ерөнхий төлөвлөгөө болоод энэ хүрээнд хийх ажлуудын талаар байнгын ажиллагаатай үзэсгэлэн, мэдээллийн цэг ажиллуулахаар бэлтгэж байгаа” гэлээ.