Барилга МН

Бурхан амьдралыг арван хуруу тэгш заяагаагүй нь нотлошгүй үнэн. Тиймээс ч хүн баян, ядуу, хоолтой, хоолгүй, гэр оронтой, гэр оронгүй амьдрах нь нотлошгүй үнэн. Хүний орон сууц нь орд харшнаас эхлээд өвсөн овоохой ч бай хамаагүй өөрийн гэсэн өртөг зардал шаарддаг. Наад зах нь гэхэд  хүйтний улиралд халаалтын зардал, түлээ нүүрснээс эхлээд бүх л зүйл оромж  болгонд  шаардлагатай. Ямар ч сууцыг нэг бол уур паараар, цахилгаанаар эсвэл пийшингээр, ил галаар халаах хэрэгцээ хүйтний улиралд гардаг. Эрхэлсэн ажилгүй, орлогогүй болоод ирэхээр хамгийн тааруу оромжны ч гэсэн зардлыг төлөх боломж хомсдоод ирдэг. Ийм болохоор орлогогүй хүмүүс дулааны сүлжээ бүхий траншейн руу ордог. Энд үнэхээрийн орон гэргүй болсон хүн ч ирдэг байна.  Орон гэрийнхээ халаалтын зардлыг даахгүй болоод амьдрал нь муудаад ирэхээр бас л ирдэг. Улсаас болон буяны янз бүрийн байгууллагаас орон гэргүйчүүлд гэр олгож, туслалцаа дэмжлэг үзүүлдэг ч  зарим хэсэг нь траншейнд амьдарч өдөр хоногийг өнгөрөөж байгаа нь нүдэнд тодхон харагдаж байна.