Нийслэлийн төвд нэг ч ам метр газар олгохгүй. Төрийн захиргааны байгууллага ч бай, хувь хүмүүсийн хүсэлт ч байсан хамаагүй. Шинээр хороолол барих газарт бодлого, төлөвлөлттэй холбож асуудлыг шийднэ" хэмээн Нийслэлийн Засаг дарга Т.Билэгт хөрөнгө оруулалтын хурал дээр хэлэв. Эд хөрөнгийн эрхийн улсын бүртгэлийн газар байраа шинэчлэхээр зөвшөөрөл хүссэн. Хариуд нь шинээр төлөвлөсөн хороололд газар өгнө гэжээ. Бидний эн тэргүүний зорилго бол Улаанбаатарын уушгийг цэвэрлэх. Тэгэхээр анхаарлаа ийш нь төвлөрүүлж ажиллаж, хандлагаа зөв тодорхойлж чаджээ, хотынхон.

Улаанбаатар хотын агаарын бохирдол хэрээс хэтэрч зарим өглөө өлмийгөө ч харж чадахгүйд хүрсэн. Өвөл утаа, зун тоосонд даруулж иргэд нь дархлаагүй болсоор удаж буй. Ийм байдал эцэслэж мэдэх нь. Инженерийн шугам сүлжээнд ойр, барилгажуулахад хамгийн боломжтой зургаан газрыг эхний ээлжинд сонгож, дахин төлөвлөлт хийжээ. Үүнээс МҮОНРТ-ийн ойр орчим, VII хорооллын төсөл бэлэн болсон байна.

Улаанбаатар хотыг 2020 он хүртэл хөгжүүлэх ерөнхий төлөвлөгөөгөөр "Хотын захын барилгажаагүй газарт дахин төлөвлөлт хийсэн орон сууцны хорооллууд", "Одоо байгаа гэр хорооллыг барилгажуулахаар төлөвлөсөн орон сууцны хорооллууд барих" хэмээн хуваажээ.

Нийслэлийн Чингэлтэй дүүргийн нутаг МҮОНРТ-ийн орчим 27 га газрыг чөлөөлж орон сууц барих юм байна. Энд оршин суудаг 2400 гаруй айл байранд орох боломжтой аж. Харин VII бичил хорооллыг барилгажуулбал 9100 өрх орон сууцтай болж, 93 га газрыг хамрах гэнэ. Тэгвэл эхний ээлжинд барилга барихаар сонгосон хэсэгт нийт арван мянга гаруй өрх амьдардаг аж. Хэдий чинээ олон өрх орон сууцанд орж чадна төдий хэмжээгээр утаа багасах нь ойлгомжтой. Өөрөөр хэлбэл, арван мянга гаруй яндан утаа үйлдвэрлэхээ болих бололтой.

Шинэ хороолол босгоход дэд бүтэц чухал. Хөрөнгө оруулалтын хурал дээр цахилгаан, дулаан, усан хангамж эх үүсвэрийн хүрэлцээ ямар байгааг удирдлагууд нь ярьж байсан. IV цахилгаан станцад бойлур тавих төсөл амжилттай хэрэгжвэл эрчим хүч үйлдвэрлэх хүчин чадал нэмэгдэх техникийн нөхцөл гаргаснаа дуулгасан. Дулааны шугам сүлжээ компанийн удирдлага ч эхний ээлжинд босох хорооллуудыг хангаж чадах хэмжээнд өргөтгөл, шинэчлэл хийж амжсанаа хэлж байв. Тэд ч бас техникийн нөхцөлөө гаргасан байна лээ. Өнгөрсөн зунжин хэл ам таталсан 25 дугаар коллектор, зургадугаар магистрал шугамын өргөтгөлийн ажил шинэ хорооллуудад хүчээ өгөх юм байна.

Энэ бүхэн ногоон гэрлээр бүтэхгүй нь ойлгомжтой. Инженерийн байгууламж, дэд бүтцийг шинэчлэх, өргөтгөх, зам талбай барих, далан үерийн суваг байгуулах гээд түмэн ажил ундрах нь мэдээж. Ажил хийж л байгаа бол хөрөнгө мөнгө хэрэгтэй болно. Анхнаасаа суурийг нь зөв тавьж, хандлагыг нь бодитой тодорхойлж чадах юм бол хөгжих хөшүүрэг байж мэднэ. Барилга барих өртгийг тооцохгүйгээр дэд бүтцийг хөгжүүлэхэд 436 сая гаруй ам.доллар шаардлагатай гэсэн ерөнхий тооцоо гарчээ.

Өнгөрсөн намар анхны цас орж өвлийн дохио өгч эхэлсэн үед Барилга, хот байгуулалтын яамныхан утаагүй түлшний зуух танилцуулах өдөрлөг хийсэн. Энэ үеэр тэндхийн мэргэжилтнүүдээс "Улаанбаатар хот хаашаа тэлэх вэ" гэж асуухад "Баруун тийшээ" гэсэн ганцхан хариулт авч амжсан. Ирээдүйд нийслэл маань Сонгинохайрхан дүүрэгт төвлөрөх аж. Нийт 450 га газар бүтээн байгуулалт өрнөж, 10 мянга гаруй айлын орон сууц шинээр барихаар төлөвлөлт хийжээ. Мөн Баянголын аманд 420 га газарт 18 мянган айлын, Баянзүрх дүүрэгт "Ургах наран" хороолол босч, 10 мянга гаруй өрх, Нисэхийн цагаан хаалга орчим "Буянт-Ухаа" хороолол барьж мөн л 10 мянга гаруй айл орон сууцанд орохоор төлөвлөжээ. Хотын шинэ төв рүү татах инженерийн шугамын ажил урагштай байгаа тухай сайхан мэдээ дуулдсан. Улаанбаатар хотыг барилгажуулах Ерөнхий сайдаар ахлуулсан ажлын хэсгийнхэн бүтээн байгуулалтын ажлаа хаанаас эхлэх, алийг нь амжуулах талаараа өнөөдөр хуралдана. Хурал дууссаны дараа бүх юм тодорхой болох биз ээ.

TODAY