Монгол улсыг хөгжлийн шинэ үед оруулахад үнэтэй хувь нэмэр оруулж буй барилгын салбарынхан "Барилгын салбарын нөөцийн удирдлага" сэдвийн дор чуулах гэж байна. Уг уулзалт семинараар барилгын салбарт тулгамдаж байгаа хүн хүч хүний нөөцийн бодлого, техник технологи, дэвшилтэт арга барилын талаар мэргэжилтнүүдийн илтгэлийг сонсож, өөрийн санал бодлоо илэрхийлэн харилцан зөвлөлдөх юм байна.

Нийгмийн хөгжлийн нүүр царай, түшиг тулгуур болсон энэ салбарынхны энэхүү арга хэмжээг БХБЯам, “Барилга.МН” Барилгын зөвлөгөө мэдээллийн төв, Монголын Хүний Нөөцийн Институт хамтран 2008 оны 2 сарын 27-нд “Сонжин Гранд” Зочид буудалд зохион байгуулах гэж байна.

Уулзалт зөвлөгөө нь дээрх сэдвийн хүрээн дэх тулгамдаж байгаа асуудлуудын талаар мэдээлэл солилцохоос гадна, барилгын салбарын удирдлагуудын хамтын ажиллагаа, мэдээлэл солилцооны тогтолцоог төгөлдөржүүлэхэд түлхүү анхаарна гэж үйл ажиллагааг гардан зохион байгуулж байгаа “Барилга.МН” Барилгын зөвлөгөө мэдээллийн төв үзэж байна.

Арга хэмжээний үеэр БХБЯам, БХБНААҮТөв, Монголын Хүний Нөөцийн Институт, “Барилга.МН” Барилгын Зөвлөгөө Мэдээллийн Төв, Гадаадын Иргэн Харьяатын Асуудал Эрхлэх Алба, Нийслэл өргөө ХК зэрэг байгууллагуудын сургалт, мэдээллээс гадна салбарын тулгамдаж буй асуудлын судалгаа шинжилгээний дүн нэгтгэл, дэвшилтэт техник технологийн үзэсгэлэн танилцуулга явагдах юм байна.

Семинар, сургалтанд ирсэнээр байгууллагынхаа хүний нөөцийн асуудлыг шийдвэрлэх арга замыг олж, Засгийн газрын барилгын салбарын хүний нөөц, гадаадын иргэдийн хөдөлмөр эрхлэлтийн талаар явуулж байгаа бодлогыг мэдэж, өөрийн санал бодлоо төрийн албан тушаалтнуудад хүргэх, сонирхсон асуултаа асуух боломжтой.  

БАРИЛГА.мн