Өнөөдөр Монголын барилгын салбарын болон салбарт үйл ажиллагаагаа явуулахаар зорьж буй аж ахуйн нэгж байгууллагууд оролцсон “Барилгын салбарын нөөцийн удирдлага” сэдэвт семинар “Сонжин Гранд” зочид буудалд явагдаж байна. Барилгын салбарт үйл ажиллагаагаа явуулж буй компаниуд салбарын тулгамдаж буй хүний нөөц, техник технологи, төрөөс салбарт баримтлах бодлого чиглэл, гадаадаас ажиллах хүч авч буй байдал, харилцаа холбооны шинэ үеийн технологи зэрэг асуудлуудаар илтгэл хэлэлцүүлэг явуулан чуулж байна.

Тус семинарт барилгын салбарын 150 гаруй байгууллагын 200 гаруй төлөөлөгч оролцож байгаа бөгөөд Барилга, Хот байгуулалтын яам “БХБЯ-ны Барилгын салбарын хүний нөөцийн бодлого”, БХБНААҮТөвийн “Барилгын салбарын ажиллах хүчний хангалт”, Барилгын зөвлөгөө мэдээллийн төв, Гадаадын иргэн харъяатын асуудал эрхлэх алба, Хөдөлмөр нийгэм халамжийн төвийн “Гадаадын ажиллах хүчний талаар баримтлаж байгаа бодлого”, Монголын хүний нөөцийн институтын “Барилгын салбарын хүний нөөцийн удирдлага, тулгамдсан асуудлыг шийдвэрлэх арга зам”, “Нийслэл Өргөө” ХК-ийн “Барилгын салбарт мэргэжилтэй ажилтан бэлтгэх боломж”, “Скайнэтком” ХХК-ийн “Шинэ үеийн суурин утас” сэдэвт илтгэлүүдийг  хэлэлцүүлэх бөгөөд илтгэлийн дүгнэлт хэлэлцүүлэг дууссаны дараа 15 цагт өндөрлөх юм.

Бид сайтаараа дамжуулан семинарт тавигдсан илтгэл, холбогдох мэдээллийг та бүхэндээ хүргэх болно.