Үнэгүй

Барилга МН

 
Дагах

Вагон хүрэлцэхгүйгээс ачаа саатаж байна

Barilga Barilga
2019-11-06
Вагон хүрэлцэхгүйгээс ачаа саатаж байна
Үзсэн: 470

Замын-Үүдэд дахиад л ачаа бөөгнөрч, түүнийг хот руу тээвэрлэх вагон хүрэлцэхгүй байгаа гэнэ. Урдаас оруулж ирсэн барилгын материал голдуу бараагаа ачих вагоны эрэлд хатсан наймаачид төмөр замд таньж мэдэх хүн хайна. Үүний хамт хил дээр удсан наймааны алдагдлаа хэрэглэгчдээс авчихна гэсэн цээжний хонжоотой өдрийг барж байна. Төмөр замаар ачаа тээвэрлэх хүндрэлтэй болсны шалтгааныг тодруулахаар УБТЗ-ын Ачаа тээвэрлэлтийн албаны дарга Б.Лхагвасүрэнтэй уулзлаа.

-Өнгөрсөн зун, намаржин вагон хүрэлцээгүйгээс Замын Үүдээс ачаагаа татаж чадахгүй байгаа тухай наймаачид ярьсан. Энэ явдал одоо бас л давтагджээ. Зохицуулах арга байхгүй юу?
-Өнөөдрийн байдлаар Замын Үүдэд 75 вагон цемент, 30 вагон тоосго хүлээгдэж байна. Тээвэрлэх ачааны хэмжээ өнгөрсөн жилийн мөн үетэй харьцуулахад 38 хувиар нэмэгдсэн. Зохицуулах арга замыг хайж. Засгийн газарт ачааны шинэ терминал буюу ачих буулгах талбай шинээр ашиглалтад оруулах хөрөнгө мөнгийг шийдэж өгөөч гэсэн хүсэлт тавьсан. Нэлээд нааштай байгаа гэсэн, удахгүй шийдэгдэх байх.

-Вагон нэмэх боломж байгаа юу?
-Манай 3000-аад вагоны 300 гаруй нь цемент ачихад зориулагдсан. Эднийгээ бүгдийг явуулж байгаа. Мөн цаг агаар дулаарсантай холбоотойгоор нүүрсний тээвэрлэлт багассан тул тэндээс бас тодорхой тооны вагоныг цемент ачихад гаргаж байна. Замын Үүдэд ачаа ихээр бөөгнөрч байгаа нь зөвхөн вагонтой холбоотой биш. Ачаа оруулж ирэхдээ манайхан авто тээврийн стандартыг дагадаггүй. Даацаас илүү, 60 тн-ын даацтай машинд 120 хүргэж ачих бол энүүхэнд. Мөн ачилтын техникийн нөхцөлийг хангадаггүй. Тоосгыг гэхэд доор нь тавиуртай, ачигч машинаар өргөөд тавьчихад хялбар байхаар ачих ёстой.
Гэтэл ширхэг ширхгээр нь чигжиж задгай ачаад, цементийг бол овоолоод оруулаад ирнэ. Задгайгаар ачсан нэг вагон тоосгыг гараар ачихад 13-14 цаг зарцуулна. Хэрэв ном журмын дагуу тавиуртай бол манайд байгаа техникийг ашиглаад ачиж буулгахад цаг орохгүй. Энэ хэрээр хүлээгдэхгүй шүү дээ.
Технологийн шаардлага хангалгүй ачсан ачааг хүлээж авахгүй байх тухай Тээвэр эрхэлсэн орлогч даргын тушаал гарсан. Өнөөдрөөс хэрэгжиж эхэлнэ. Тэгэхээр жаахан дээрдэх байх.

-Хотод авчирсан хойно нь хэр хурдан буцаагаад явуулах боломжтой байдаг бол, вагонуудыг?
-Наадах чинь гол асуудал болоод байгаа юм. Манайханд би л болж байвал бусад нь хамаагүй гэсэн сэтгэлгээтэй хүн олон. Улаанбаатарт авчирсан хойно ачаагаа авахгүй хэд хоногоор байлгаж вагон уяна. Өнөөдрийн байдлаар 54 вагон ачааныхаа эзнийг хүлээгээд сууж байна. Бүтэн долоо хоносон ачаа ч олон. Гаалийн татвараа төлж дийлдэггүй, өөрийн гэсэн агуулах савгүй хүмүүс авахгүй уддаг. Гэтэл Замын Үүдэд вагон хүрэлцэхгүй хүмүүсийг бухимдуулж байна шүү дээ. “Эко констракшн” гэж барилгын компанийн нэр дээр 42 вагон байна. Тэднийх өдөртөө ердөө таван вагон буулгах чадалтай.

-Замын-Үүд дээрх ачааны дийлэнх нь барилгын материал уу?
-Жимс, хүнсний ногоо зэргийг өдөрт нь ачдаг журамтай. Хүнс, төрөл бүрийн ачаа, цемент, тоосго гээд ангилчихдаг юм. Тэр ангиллаар дугаарлаад ачуулдаг.

-Ачаа тээвэрлэлтийн тариф нэмэгдсэн үү?
-Замын-Үүдээс Улаанбаатарт хүргэж байгаа ачааны тээврийн хөлс сүүлийн хэдэн жилд нэмэгдээгүй. Энэ хооронд төмөр замаар 700 км. Тээврийн хөлс нь 420 мянган төгрөг.

-Нэг вагон уу?
-Нэг вагон буюу 60 тн цемент ачихад. Гэтэл Эрээнээс Замын Үүд орох зургаан км замд машинаар оруулж ирэхдээ өнгөрсөн жил оргил үед тээврийн хөлсөнд нэг сая орчим төгрөг өгч байсан гэхээр ялгаа нь харагдаж байна уу.
Зөвхөн Замын Үүдэд 400 гаруй ачигч 24 цагаар ажилладаг ч хүрэлцдэггүй. Тиймээс хүний нөөцийн асуудлыг   ярих хэрэгтэй болсныг Б.Лхагвасүрэн дарга учирласан. УБТЗ-ын удирдлагууд оюутнуудыг зун отряд маягаар ажиллуулах боломжийн талаар МОХ-той санал солилцож байгаа гэнэ.
 
TODAY