Барилга.мн БЗМТөвийн хувьд 2009 онд олон арга хэмжээг барилгын салбарын мэргэжилтнүүд, байгууллагуудын дунд зохион байгуулсан бөгөөд барилгын портал www.barilga.mn, онлайн туслах, нэгдсэн лавлах 1895 –р дамжуулан төрөөс барилгын салбарын талаар авч хэрэгжүүлж байгаа бодлого, шийдвэрийг цаг тухайд нь үнэн бодитоор хүргэж, барилгын үнэ ханш, шинэ орон сууцны мэдээллийг дотоод, гадаадад ажиллаж амьдарч буй иргэддээ хүргэж ажиллалаа.

 

 

2009 онд хийсэн зарим ажлуудаас дурьдвал, 2009 оны 2 сарын 10-нд барилгын салбарын 50 гаруй байгууллагуудын төлөөлөл бүхий “Барилгын салбарын борлуулалтыг нэмэгдүүлэх нь” сэдэвт семинар, 2 сарын 18-22-нд БНСУ-ын Сөүл хотод болсон “Кюнхянг” барилгын үзэсгэлэнд зочилж, БНСУ-ын барилгачдын холбоотой хамтран ажиллах гэрээ байгуулсан. 2009 оны 5 сард барилгын салбарын 100 гаруй байгууллагуудын төлөөлөл бүхий “Barilga Sale-2009” үзэсгэлэн худалдааг “Тэх” худалдааны төвд зохион байгуулсан бөгөөд оролцсон аж ахуйн нэгжүүд бараа үйлчилгээ, орон сууцаа хямдралтай үнээр зарж борлуулсан.

 

2009 оны 6 сард БНХАУ-ын Эрээн хотод Монгол-Хятадын барилгачдын бизнес уулзалтыг зохион байгуулсан бөгөөд 2 талын барилгын байгуулагуудын хооронд хөрөнгө оруулалтын болон хамтын ажиллагааны олон гэрээ үзэглэгдсэн билээ. Мөн энэ оны 8 сард ОХУ, БНХАУ, Украйн, БНСУ, Тайвань, Турк, Израйль зэргийн улсуудын төлөөлөл бүхий олон улсын “Barilga Expo-2009” барилгын үзэсгэлэнг Мишээл Экспо төвд амжилттай зохион байгуулсан.

 

Одоогоор 2009 оны 12 сарын 08-с эхэлсэн “Орон сууц-4000” онлайн экспо /http://expo.barilga.mn/ үргэлжлэн явагдаж байгаа бөгөөд Засгийн газраас зарласан төрийн албан хаагч, иргэдийг орон сууцжуулах “Орон сууц-4000”  дэд хөтөлбөрт хамрагдсан орон сууцны мэдээллийг дэлгэрэнгүйгээр үзэж сонгон, захиалах боломжийг олгож байна.

 

Бид цаашдаа барилгын салбарыг хамарсан олон арга хэмжээг шат дараатайгаар зохион байгуулж, barilga.mn сайтаар дамжуулан иргэдэд мэдээлэх болно.

 

2010 онд та бүхэндээ хамгийн сайн сайхныг хүсэн ерөөе. 

 

 

Барилга.МН БЗМТ-ийн хамт олон