УИХ-ын чуулганы нэгдсэн хуралдаанаар хэлэлцсэн эхний асуудал нь Аж ахуйн нэгжийн орлогын албан татварын тухай хуульд нэмэлт оруулах тухай, Газрын төлбөрийн тухай хуульд нэмэлт оруулах тухай, Үл хөдлөх эд хөрөнгийн албан татварын тухай хуульд нэмэлт оруулах тухай хуулийн төслүүдийн эцсийн хэлэлцүүлэг байлаа. Төсвийн байнгын хороогоор хэлэлцсэн дүгнэлтийг танилцуулсны дараа санал хураалт явуулан олонхийн саналаар хуулиудыг баталлаа.

 

Эрүүгийн хуульд нэмэлт, өөрчлөлт оруулах тухай хуулийн төслийг мөн олонхийн саналаар баталсан. Хууль зүйн байнгын хороогоор уг хуулийн төслийг хэлэлцээд анхны хэлэлцүүлгээр батлах саналыг ирүүлснийг хуралдаанд оролцогчдын 85.2 хувь нь дэмжсэн юм. Үүний дараа “Шинэ Улаанбаатар” түр хороо байгуулах тухай Улсын Их Хурлын тогтоолын төслийг мөн анхны хэлэлцүүлгээр баталлаа.

 

УИХ-ын гишүүн Э.Бат-Үүл   “Шинэ Улаанбаатар” түр хороо хот төлөвлөлтөд оролцох, хотын ирээдүйн стандарт түвшинг тогтоох зорилготойн алин болохыг тодруулсан. УИХ-ын гишүүн Д.Очирбатын тайлбарласнаар, түр хороо хот байгуулалт, газар олголт гэх мэт Засаг даргын ажилд хутгалдан орохгүй юм байна. Харин Улаанбаатар хотын хууль эрхзүйн орчныг сайжруулах, хотын стандарт түвшинг тогтоох гэх мэт гол гол асуудлыг шийдвэрлэхэд хууль эрхзүйн орчинд дэмжлэг туслалцаа үзүүлэх зорилготой аж.

 

Биеийн тамир, спортыг хөг­жүүлэх талаар төрөөс баримтлах бодлого батлах тухай Улсын Их Хурлын тогтоолын төслийн эцсийн хэлэлцүүлгийг хийлээ. Нийтийн биеийн тамир спортыг дэмжих арга хэмжээг Эрүүл мэндийг дэмжих сангаас санхүүжүүлдэг. Тамхинд ногдуулдаг онцгой албан татварын хоёр хувийг тус санд төвлөрүүлдэг бөгөөд тус санд төвлөрсөн мөнгөний 4.5 хувийг нийтийн биеийн тамир, спортод зарцуулдаг гэсэн тооцоо бий аж. 2008 онд тамхины онцгой албан татварын хоёр хоёр хувь буюу 600 гаруй сая төгрөг тус санд орсон аж. УИХ-ын эрхэм гишүүд архины онцгой албан татварын орлогын хувийг энэхүү санд төвлөрүүлбэл нийтийн биеийн тамир, спортод зарцуулах мөнгө илүү нэмэгдэнэ гэсэн саналтай байсан. Хэрэв архины татвараас хоёр хувийг дээрх санд төвлөрүүлбэл жилдээ 1.7 тэрбум төгрөг болж өсөх тооцоо байгаа аж.

 

УИХ-ын гишүүн О.Чулуунбат, Төрөөс зарцуулж байгаа мөнгө бүх нийтийн биеийн тамирт бус, цөөн хүний хоббид зарцуулагдаад байгаа юм биш биз дээ хэмээн лавлаж байсан. Тэрбээр нийтийн биеийн тамирыг төрөөс санхүүжүүлж, спортын арга хэмжээг тодорхой холбоод нь санхүүжүүлж байвал дээр гэсэн саналтай байлаа. Эрүүл мэндийн сайд С.Ламбаа, Өнөөдөр зарцуулж буй мөнгөний долоон хувь нь нийтийн биеийн тамирт, бусад нь спортын бусад арга хэмжээг зохион байгуулахад зарцуулагдаж байгаа гээд тэрхүү харьцааг дээрх тогтоол батлагдсаны дараа өөрчилнө хэмээн мэдээлсэн.Энэхүү тогтоолын төслийг хуралдаанд оролцсон гишүүдийн 78.2 хувийн саналаар баталлаа.

 

Нэгдсэн хуралдаанаар хэлэлцсэн удаах асуудал нь Хөдөлмөр эрхлэлтийг дэмжих тухай хуульд нэмэлт, өөрчлөлт оруулах тухай хуулийн төслийг хэлэлцэх эсэх асуудлыг хэлэлцэх байв. Уг хуулийн төсөлд, Хөдөлмөр эрхлэлтийг дэмжих тухай хуулийн 10 дугаар зүйлийн 10.3-ын “нэг сая хүртэл төгрөгийн зээлийг 1 жил хүртэл хугацаагаар олгож болно.” гэснийг “нэг сая хүртэл төгрөгийн зээлийг 1 жил хүртэл хугацаагаар ирээдүйд олох орлогоор нь барьцаалан олгох бөгөөд гурван сая хүртэл төгрөгийн зээлийг 2 жил хүртэл хугацаагаар олгож болно.” гэж өөрчлөхөөр тусгажээ.

 

Төсөл санаачлагчдын нэг УИХ-ын гишүүн Б.Бат-Эрдэнийн танил­цуулснаар, Хөдөлмөр эрхлэлтийг дэмжих тухай хуульд 2006 онд нэмэлт, өөрчлөлт оруулан иргэдэд материал, түүхий эд, үр, бордоо, мал, тэжээвэр амьтан, тоног төхөөрөмж, багаж, хэрэгсэл зэргийг худалдан авахад нь зориулж нэг сая хүртэл төгрөгийн зээлийг 1 жил хүртэл хугацаагаар олгож болохоор заасан байдаг аж. Энэ заалтын дагуу зөвхөн 2009 онд гэхэд 11.0 тэрбум төгрөгийн зээл олгосон нь хөдөлмөр эрхлэгчдийг төрөөс дэмжсэн томоохон алхам болсон бөгөөд түүнээс хойших 2 жил гаруйн хугацаанд техник, тоног төхөөрөмж, бараа материал, шатах тослох материалын үнэ өсч үйлдвэрлэлийн зардлаа нөхөж чадаагүй байх үед авсан зээлээ эргэн төлөх байдалд орох зэргээр ихээхэн хүндрэл гарах болсон байна.

 

Дээрх байдлыг харгалзан зээлийн хэмжээг нэг саяас гурван сая хүртэл нэмэгдүүлэх, зээл эргэн төлөгдөх хугацааг нэг жилээс хоёр жил хүртэл уртасгах нь зүйтэй гэж үзсэний дээр өмнө үйлчилж байсан жилийн хугацаатай сая хүртэлх төгрөгийн зээлийг барьцаагүй буюу ирээдүйд олох орлогоор барьцаалан олгодог байхаар хуулийн төслийг боловсруулжээ.