Тайваний нийслэл Тайпей хотод дэлхийн хамгийн өндөр барилга сүндэрлэдэг. Энэ барилгын нийт өндөр нь 508 метр. 101 давхар энэхүү аварга байгууламжийг зохион бүтээгч нь түүнийг “Тайпэй 101” гэж нэрлэжээ. Цамхагийн суурийг газрын гүн рүү 40-60 метр ухаж хөдөлшгүй чулуун хөрсөнд тулгаж цул, ган бетоноор цутгаж суулгажээ. “Тайпэй 101” цамхагийг барихад 107000 тн ган, 242 852 шоо метр бетон орсон бөгөөд түүнийг 1,5 тэрбум евро зарцуулан зургаан жилийн турш барьж 2004 оны арванхоёрдугаар сард ашиглалтад оруулжээ. Банк, санхүүгийн зориулалттай энэ өндөр цамхаг нь 63 цахилгаан шаттай. Түүний 34 нь давхар шат юм.  Цамхагийн гадна талд 101 метрийн өндөрт түүнийг банк, санхүүгийн төв болохыг бэлгэдсэн аварга том зоосыг байрлуулсан байдаг. Цамхагийн 500 метрт нисэх онгоцонд анхааруулагч гэрлэн дохио байрлуулсан бөгөөд түүнийг тодорхой цагт байнга сольдог. Энэхүү цамхагийг ашиглалтад оруулахаас нэг жилийн өмнө буюу 2003 оны арваннэгдүгээр сард цамхагийн 45 метрийн өндөрт гангаар хийсэн бөмбөгөр дээвэр бүхий дөрвөн давхар худалдааны төвийг ашиглалтад оруулжээ. Одоо энэ төвд нийтдээ 163 дэлгүүр үйл ажиллагаа явуулж байна. Цамхагийн бүрэлдэхүүн хэсэг болох 60 метр өндөр, цул гангаар хийсэн шовх орой нь барилгыг хүчтэй савалтаас хамгаалдаг байна. Учир нь Номхон далайн эрэг талаас жилд 3-4 удаа 250 км цагийн хурдтай халуун орны далайн хар шуурга Тайвань орныг дайран өнгөрдөг. Түүнээс гадна өдөр бүр их бага ямар нэг хэмжээгээр газар байнга хөдөлж байдаг ажээ. Цамхагийг зохион бүтээгч инженерүүд сүүлийн 2500 жилд болж байсан хамгийн хүчтэй газар хөдлөлтийг ч тэсвэрлэж чадна гэж тооцоолж буй ч амьдрал дээр энэ нь хэрэгжих эсэхийг өнөөдөр хэн ч хэлж мэдэхгүй байна. “Тайпэй 101” цамхагийн цахилгаан шат дэлхийн хамгийн хурдан нь юм. Онгоцны кабин шиг ямар ч аргаар ордоггүй битүү, 1,7 сая еврогийн өртөгтэй энэхүү цахилгаан шат нэг секундэд 17 метрийн өндөрт гардаг. Өнөөдөр “Тайпэй 101” цамхагт 10 мянга гаруй хүн ажиллаж байна. Цамхагийн хамгийн доод хэсэгт 2990 мотоцикль, 1839 авто автомашин тавих талбай бүхий гарааш бий. 1997 онд Тайваний шилдэг менежер Хонг-Минг Лин “Тайпэй 101”-ийг барихад шаардлагатай 1,5 тэрбум еврог 48-хан цагийн дотор цуглуулж чадсан гэдэг. Дэлхийн хамгийн өндөр энэ цамхаг ердөө л 62x62 метр газарт баригдсан нь ямар бага талбайд аварга том барилга байгууламж барьж болдгийн гайхамшигт жишээ юм.