Засгийн газраас хэрэгжүүлж буй "40 мянган орон сууц" хөтөлбөрийн хүрээнд барих барилгыи ажил өнгөрсөн долоо хоногийн сүүлчээс зогслоо. Зуурмаг царцааж, тоосго гар хайрсан хүйтэн нэгэнт айлчилсан тул урин дулаан болтол барилгын ажлыг түр зогсоохоор шийдвэрлэжээ. Нийслэл, 21 аймаг, 185 суманд хэрэгжүүлж буй эл хөтөлбөрийн хүрээнд барьж байгаа барилгын ажил 40-өөд хувьтай байна. Нийт 1656 айлын сууц барихад 19.3 орчим тэрбум төгрөг төсөвлөсөн. Үүнийг 60 гаруй аж ахуйн нэгж барьж байгаа юм.

Аймгийн төвүүдэд барьж буй 40 айлын орон сууц энд тэнд алаг цоог босч байна. Өвөрхангай, Сэлэнгэ аймгийн төвд энэ орон сууцны 50-60 хувийг босгоод байхад Дархан-Уул, Говь-Алтай, Архангай аймагт хөтөлбөр урагшилсангүй. Эдгээр аймагт 40 айлын орон сууцны шавь тавьснаас цааш хэтэрсэнгүй. Дөрөв, найман айлын орон сууц барих ажил бас л жигд бус байна. Дорнод, Говь-Алтай аймгийн зарим сумын төрийн албан хаагчид шинэ байрандаа төвхнөж эхэлсэн атал Булган, Төв, Ховд, Увс аймгийн сумдад барилгын суурь ч тавьж амжаагүй байх юм. Харин Дархан-Уул, Орхон, Дундговь, Завхан аймагт энэ ажил талдаа оржээ. Ирэх хавар барилгын ажлыг хэвийн үргэлжлүүлж чадвал 2008 онд багтаан ашиглалтад оруулах боломжтой аж. Тэгвэл 20 айлын орон сууцыг дөнгөж барьж эхлээд ажлаа зогсоолоо. Барилгын ажил зогсохтой зэрэгцээд "40 мянган орон сууц" хөтөлбөрийг хэрэгжүүлэхэд оролцож буй барилгын компанийн эзэд Орон сууцны санхүүжилтийн корпораци, Сангийн яам, Барилга, хот байгуулалтын яамны үүдийг сахиж суудаг ажилтай болжээ. Тэд орой сууцны санхүүжилт, хийсэн ажлын хөлсөө авахын тулд ийн яам, байгууллагын үүдээр эргэлдэх болсон байна.

Хөтөлбөрийн хүрээнд орон сууц барьж буй компаниуд тендерт шалгарахдаа "амлаж" авсан барилгынхаа 30 хувийг өөрсдийн хөрөнгөөр барьж эхэлсэн. Сангийн болон Барилга, хот байгуулалтын сайд нарын хамтарсан тушаалаар баталсан "40 мянган орон сууц" хөтөлбөрийн санхүүжилтийн журмаар бол Орон сууцны санхүүжилтийн корпораци арилжааны банкаар дамжуулан барилгын санхүүжилтийг олгох ёстой. "40 мянган орон сууц" хөтөлбөрийг хэрэгжүүлэхэд хамтран ажиллах саналаа өгч, шалгуур үзүүлэлтийг хангасан арилжааны банкуудыг Орон сууцны санхүүжилтийн корпораци, Сангийн яам хамтран шалгаруулсан.

Хөтөлбөрийг хэрэгжүүлж эхэлснээс хойш 1.5 тэрбум төгрөгийн ажил гараас гарчээ. Энэ мөнгийг "Голомт" банкнаас гаргуулж барилгын компаниудад өгсөн. Одоо дахиад 1.4 тэрбум төгрөгийн ажлын хөлс нэхэгдэж байгаа аж. Түүнийг өгөхөд хүндрэл учраад байгаа. Уг нь үүнийг өгөхөд хүрэлцэх мөнгө бий гэнэ. Засгиин газрын бондыг арилжиж олсон мөнгийг арилжааны гурван банкинд байршуулсан ч "Голомт", Улаанбаатар хотын банк”-ныхан Орон сууцны санхүүжилтийн корпорацийг Сангийн яамтай хэл амаа ололцож, дахин маргаан гарахгүй болсны дараа мөнгө шилжүүлнэ гээд гэдийчихжээ.

Барилгын компаниуд Орон сууцны санхүүжилтийн корпорациас мөнгөө нэхэж, нөгөөдүүл нь Сангийн яам, арилжааны банкуудын хооронд арга эвийг нь олох гэж гүйсээр хэдэн сар болж байгаа юм. ОССК-ийн гүйцэтгэх захирал Ж.Жаргалсайханыг огцруулж, оронд нь Сангийн сайдын зөвлөх Ж.Алдаржавхланг томилсон. Шинэ захирал нь Сангийн яамны хүн тул дээрх асуудлыг цэгцэлж, нэг мөр болгох байх хэмээн ОССК-ийнхан найдаж сууна. Барилгын компаниудын санхүүжилтийг хэрхэн олгох, арилжааны банкуудаас санхүүжилтийг яаж шилжүүлэх талаарх журмыг энэ долоо хоногт цэгцлэх юм байна. ОССК-ийн Төлөөлөн удирдах зөвлөл өнөөдрийн хурлаараа энэ тухай ярилцах сурагтай.

TODAY