ОХУ-ын дотоодын зах зээлд түлш шатахууны үнэ 5.2-30.2 ам.доллараар нэмэгдсэнээс тус улс нефть бүтээгдэхүүний экспортын татвараа тонн тутамд нь 29.8 ам.доллараар нэмжээ. Үүнээс улбаалаад манайд шатахууны үнэ өсөх нь хэмээн иргэд бухимдах болоод байгаа. Оросын тал үнэ нэмэхээс өмнө ирсэн шатахууныг хуучин үнээр нь борлуулж дуустал үнээ нэмэхгүй хэмээн манай томоохон нефть импортлогчид мэдэгдэж байсан. Гэвч өчигдөр үдээс хойш манай томоохон нефть импортлогчид шатахууны үнийг 30-70 төгрөгөөр нэмжээ.

АМГТХЭГ-ын Газрын тос хангамж зохицуулалтын хэлтсийн дарга Д.Амарсайхан “Бид зарим төрлийн шатахууныг урд хөршөөс харьцангуй хямд үнэтэй авч байгаа учраас ОХУ-ын талд үнээ нэмэгдүүлэхгүй байх саналыг байнга тавьж байснаар сүүлийн хагас жилд түлш шатахууны үнийг тогтвортой хадгалсан. Гэвч энэ удаад зайлшгүй нэмэгдэх болж байна. Хэрэв гадаад зах зээл дээрхи нэмэгдсэн үнээр нь тооцвол нэг литр шатахууны үнэ 100-150 төгрөгөөр нэмэгдэхээр байгаа. Гэвч бид нефть импортлогч байгууллагуудтай тохиролцож үнийг  нь ердөө 30-70 төгрөгөөр өсгөхөөр болсон” гэж ярьжээ. Албаны хүмүүсийн яриагаар энэ удаагийн шатахууны үнийн өсөлт нь өргөн хэрэглээний барааны үнэд төдийлөн нөлөөлөхгүй гэсэн.