Арванхоёрдугаар сарын 04-ний өдөр Монголын Сэргээгдэх эрчим хүчний одоогийн байдал болоод энэ салбарын ирээдүйн чиг хандлагын талаар Монголын засгийн газар, төрийн бус байгууллага, хувийн хэвшил, их дээд сургуулийн үндэсний мэргэжилтнүүд хэлэлцэх гэж байна.

 

Эрдэс баялаг, эрчим хүчний яамнаас зохион байгуулсан өнгөрсөн жилийн анхдугаар форумд 36 байгууллагын 140 төлөөлөгч оролцож нийт 21 илтгэлийг хэлэлцүүлсэн билээ. Тэгвэл энэ удаагийн форумыг ЗГ-ын хэрэгжүүлэгч агентлаг Эрчим хүчний газар зохион явуулахаар болжээ.

 

Сэргээгдэх эрчим хүчний үндэсний форумын гол зорилго нь салбарын бодлого тодорхойлогчид, түүнийг хэрэгжүүлэгчид, судлаачид, хувийн хэвшил гээд салбарын бүх төлөөллийг оролцуулж Сэргээгдэх эрчим хүчний үндэсний хөтөлбөр, сэргээгдэх эрчим хүчний тухай хуулийн хэрэгжилт болон тулгарч буй хүндрэл түүнийг даван туулах арга замуулын талаар ярилцахад орших ажээ.

 

Форумд Эрдэс баялаг, эрчим хүчний яам, Хүнс хөдөө аж ахуй, хөнгөн үйлдвэрийн яам, Байгал орчин, аялал жуучлалын яам, Боловсрол соёл, шинжлэх ухааны яам, Эрчим хүчний газар, Эрчим хүчний зохицуулах газар, Дэлхийн банк болон бусад байгууллагуудын удирдлагууд оролцохоор болсон байна.