Дархан хот байгуулагдсаны 50 жилийн ой угтсан ажлын хүрээнд Дархан сумын Ахмадын хорооноос санаачлан тус хотын тулгын чулууг тавилцсан ахмадуудыг урьж уулзалт хийв. Уулзалтад 1961 оны 10 дугаар сарын 17-нд хотын суурь тавих ёслолын ажиллагаанд оролцсон одоо амьд сэрүүн байгаа 26 ахмад болон бусад өндөр настан оролцлоо.

 

Хотыг бүтээн байгуулж байсан үеийн түүхийг үнэн мөнөөр нь бичиж ойн өмнө ном болгон гаргахад өөрсдийн дурамжаа бичиж мөнхлөн үлдээхийг зорьж байгаа гэж сумын ахмадын хорооны дарга Тожил уулзалтыг нээхдээ мэдэгдэв. Уулзалтад оролцсон ахмадууд Дархан хотын суурийг нэг л өдөр гэв гэнэтхэн тавьчихаагүй, түрүүлж ирсэн барилгачин дайчдын майхан ярайж байсныг ч дурссан.Тэд анхны барилгын суурь тавьсан байшин болон хотыг зөвхөн Монголын барилгачид, барилгын цэргийн ангиуд, төдийгүй Оросын барилгын СОТ- 1 байгууллага, орос цэргийнхэн, эх орны өнцөг булан бүрээс ирсэн илгээлтийн эзэд оролцож бүтээн байгуулсныг номдоо үнэн мөнөөр бичиж үлдээхээ илэрхийлэв.