“Чанар” гэдэг зүйл он удаан жилийн эдэлгээнд танигддаг, батлагддаг. Тиймээс аливаа зүйлс чанараа алдалгүй оршин тогтнож чадвал үнэ цэнэ нь үеийн үед хадгалагдан үлддэг. Үүний нотолгоо бол Монгол Улсын Ууган архитектор Буджавын Чимэд агсан, түүний бүтээлүүд билээ. Түүний босгосон бүтээл бүр нь эх орондоо өдгөө сүндэрлэсээр байна.
     
   Монгол Улсдаа архитектурын салбарын хөгжлийг цэцэглүүлсэн Чимэд агсны мэндэлсний 100 жилийн ойг энэ оны 10-р сарын нэгний өдөр тэмдэглэн өнгөрүүлэх тухай Барилга, хот байгуулалтын сайдын 2018 оны 7 дугаар сарын 03-ны өдрийн 120 дугаар тушаал гарч, ойг тэмдэглэн өнгөрүүлэх Ажлыг зохион байгуулах үүрэг бүхий ажлын хэсэг байгуулагдлаа.



“Улаанбаатар” зочид буудал - 1972 оны таталбар зураг

   Монголын орчин үеийн архитектурын хөгжилд оруулсан түүний хувь нэмэр асар их юм. Тоо баримтаас дурдвал тэрбээр архитектурын 22, хот төлөвлөлт, цэцэрлэгжүүлэлтийн 5, интерьер дизайны 3, хөшөө дурсгал, сүрлэг байгууламж 11, нийт 41 бүтээл туурвижээ. Тэрээр 1940-1948 онд ЗХУ-ын Москва хотын Архетиктурын техникум, Архитектурын дээд сургуульд суралцаж төгссөн.


Улаанбаатар хотын төв Д.Сүхбаатарын талбайг хөгжүүлэх төслийн таталбар зураг 1950-иад он 

   1953-1956, 1961-1969 онд Улаанбаатар хотын архитектор, 1973-1979 онд Дархан хотын Ерөнхий архитектор, Дархан хотын орлогч даргаар ажиллаж байсан. Архитектур төлөвлөлт газрын орлогч дарга, Улсын барилгын хорооны орлогч дарга, Улсын барилга эдийн засгийн комиссын нэгдүгээр орлогч даргаар ажиллаж байжээ. Монгол Архитекторуудын Эвлэлийн анхны ерөнхийлөгчөөр 1957-1963 онд ажиллаж байв. Улаанбаатар зочид буудлын барилгын зургаар 1979 онд МАЭ-ийн Нэрэмжит шагналын эзэн болж байжээ.