Найман хувийн хүүтэй ипотекийн зээлийг бага, дунд орлоготой иргэдийг орон сууцжуулахад дэмжлэг үзүүлэх зорилгоор 2013 оны зургадугаар сараас хэрэгжүүлж эхэлсэн. Дөрөв дэх жилдээ хэрэгжиж буй тус зээлд өнгөрсөн 2017 оны эцсийн байдлаар нийт 93,147 иргэн хамрагдсан статистик тоог Монголын ипотекийн корпорациас мэдээлсэн байна. 

   Тэгвэл энд Монгол Улс ОУВС-гийн “Өргөтгөсөн санхүүжилтийн хөтөлбөр”-т хамрагдсанаар тус зээлд хамрагдах иргэдийн тоог тодорхой хувиар буюу нэг мянгаар бууруулаад байгаа юм. Үүнтэй холбоотойгоор зээлд хамрагдахыг хүсэх иргэдийн тоо улам бүр нэмэгдэж, арилжааны банкуудын зээлдэгчдэд тавих босго өндөрсөж, иргэдийн дунд банкууд зээл олгохгүй байна гэсэн гомдол, шүүмжлэл гаргаад байгаа юм.  

   Монголбанкаас өнгөрсөн долоо хоногт зарласан хэвлэлийн бага хурлын үеэр ипотекийн зээлтэй холбоотой зарим статистик мэдээллийг өгсөн. Тодруулбал, энэ оны эхний долоон сарын байдлаар Монголбанк, Засгийн газраас арилжааны банкуудаар дамжуулан иргэдэд нийт 171 тэрбум төгрөгийн санхүүжилтыг олгоод байгаа аж. Энэ оныг дуустал нэмээд 150 тэрбум төгрөгийн санхүүжилт олгогдохоор төлөвлөсөн байна.

   Энэ талаар Монголбанкны эх сурвалжаас тодруулахад “Монголбанкнаас сар бүр ипотекийн зээлийн санхүүжилтэд 16 тэрбум, Сангийн яамнаас улирал тутамд 30 тэрбум  буюу сар бүр 10 тэрбум төгрөгийг олгож байна. Нийт 40 гаруй тэрбум төгрөгийн санхүүжилтийг олгосноор сард 800-900 гаруй иргэд ипотекийн зээлд хамрагдах нөхцөл бүрдэж байгаа. Иргэдийн зүгээс Монголбанканд зээл олгогдохгүй байна гэсэн гомдол, шүүмжлэлийг байнга ирүүлдэг. Үүнтэй холбоотойгоор хамгийн сүүлд буюу 2016 онд ипотекийн хөтөлбөрийн шалгалтыг Монголбанкаас арилжааны банкуудад явуулсан. Энэ онд тус шалгалтыг дахин явуулахаар төлөвлөж байна” гэв.
           
   Тодруулбал, одоогоор Монголбанкнаас арилжааны банкуудад активийн чанарын үнэлгээ, мөнгө угаах, тероризмыг санхүүжүүлэх, ОУВС-гийн Монгол Улсад хэрэгжүүлж буй Өртгөтгөсөн санхүүжилтийн хөтөлбөрийн шалгалтуудыг явуулж байгаа аж. Эдгээр шалгалтыг хийж дууссаны дараа ипотекийн хөтөлбөртэй холбогдуулан арилжааны банкуудад он дуусахаас өмнө шалгалт явуулна гэдгийг нэмж тайлбарлалаа. Түүнчлэн ОУВС-гийн “Өргөтгөсөн санхүүжилтийн хөтөлбөр”-ийн хүрээнд Монголбанк Засгийн газартай тохирсны дагуу 2019 оны  нэгдүгээр сарын нэгнээс ипотекийн хөтөлбөрийг Засгийн газарт шилжүүлэх юм байна.
 
Бэлтгэсэн: Б.Бямбасүрэн