“Эн Эй Пи групп”, “Татах хүч”, “Интеллект тауэр” компаниудын хамтарсан “10l100 #ARCHITECTS” үзэсгэлэнгийн нээлт өнөөдөр Norphei арт галлерейд болов. Үзэсгэлэнд ахмад болон залуу үеийн төлөөлөл болсон архитекторууд, зураг төслийн компанийн мэргэжилтнүүд, энэ чиглэлээр суралцаж буй ШУТИС-Барилга, архитектурын сургууль болон бусад сургуулийн оюутан залуус ирсэн байлаа.  

   Norphei арт галлерейд тус гурван компанийн хамтран гаргасан хамгийн орчин үеийн ажлын зураг төсөл, барилга, байгууламжийн загваруудыг олон нийтэд танилцуулахаар дэлгэжээ. Тухайлбал, сүүлийн үед нийслэл хотод баригдсан өнгө үзэмжтэй, дэвшилтэт технологи бүхий орчин үеийн архитектурын чиг хандлагыг харуулсан барилга байгууламжуудын зураг, төсөл дийлэнх нь байсан бол хот төлөвлөлтийн зарим шийдлүүдээс ч танилцуулахаар бэлтгэсэн байлаа.





   Үзэсгэлэнгийн бас нэгэн чухал арга хэмжээ нь хүний эрүүл мэнд, хүрээлэн буй орчинд сөрөг нөлөөгүй, тогтвортой хөгжил бүхий ногоон хот, ногоон барилгыг хөгжүүлэх чиглэл, тулгамдаж буй асуудлаар экспертүүдийн санал бодлыг сонсож, залуу архитекторуудад, энэ чиглэлээр суралцаж, судалж буй оюутан залууст үнэтэй зөвлөгөөг хүргэх явдал байв. Ингээд барилгын салбарын “акулууд” ногоон барилга, байгууламжийн талаар юу гэж хэлснийг хүргэе.  


 

   Монголын барилгын зураг төсөл зохиогчдын холбооны ерөнхийлөгч Н.Дорж:


        
   -Ногоон хөгжлийн үзэл баримтлалыг дэлхий нийтээр барьж буй энэ цаг үед Монгол Улсын барилгын салбар хэрхэн ногоон барилга барих вэ гэсэн асуултын өмнө ирлээ. Манай барилгын зарим компаниуд байшингаа ногооноор будах, гадна талбайдаа мод тарьснаа ногоон барилга байгууллаа гэж ойлгодог. Аливаа зүйлийг цогцоор нь бүрдүүлж байж ногоон барилга гэж нэрлэх учиртай. Монгол Улс жилийн найман сард халаалт, цахилгаан хэрэглэдэг. Үүний тулд зөвхөн нүүрснээс эрчим хүч гарган авч, агаар орчныг бохирдуулж байна. Энэ асуудлыг шийдвэрлэх гол гарц нь улсын бүх салбарт ногоон байгууламжийн шийдлийг нэвтрүүлэх хэрэгтэй байна. Ингэснээр эрчим хүч ашиглалтын зардал 4-5 дахин буурна гэсэн судалгаа гарсан.    

    

Монголын барилгын хөгжлийн үндэсний нэгдсэн төвийн УЗ-ийн дарга Г.Мягмар:



   -Сүүлийн үед барилгын салбарын дэлхийн чиг хандлага ногоон чиг баримжаатай барилга, байгууламж, хот төлөвлөлт байгуулах тийш хандаж байна. Манай улсад ногоон барилга, байгууламжийн тухай ойлголт дөнгөж эхлэл шатандаа, барилгын салбарынхан маань энэ тухай ярьж л эхэлж байгаа. Ногоон барилга, байгууламжийг хөгжүүлэхийн тулд зураг, төслийн мэргэжилтнүүдийг маш сайн бэлтгэх хэрэгтэй. Ерөөс зураг төсөл, техникийн шийдлийг хэр сайн тооцоолж хийнэ, тэр дагуу л тухайн барилга, байгууламжийн бүтэц бий болдог ёстой. Тиймээс ногоон барилгын зураг төслийг сайтар төлөвлөж хийх хэрэгтэй.
 
   Мөн энэ үеэр "Light from the Shade-2018" гэрэл зургийн уралдааны шагнал гардуулах ёслол боллоо. Тус уралдаанд оролцохоор 775 бүтээл ирсэн байна.
Эдгээрээс шүүгчдийн бүрэлдэхүүн 100 бүтээлийг сонгож үзэсгэлэнд тавьж, нийтийн хүртээл болгосон. Улмаар шилдгийн шилдэг дөрвөн бүтээлийг шалгаруулж, байр эзлүүлэн мөнгөн шагнал болон өргөмжлөлөөр урамшуулав.







Тэргүүн байр - Т. Хангарьд “Central tower” коллож
Дэд байр - Г. Цовоодаваа “Logarithm secondary school” бүтээлээр
Гутгаар байр - “MIND STORM” баг “Хүүхдийн урлан бүтээх төв” бүтээлээр
Тусгай байр - Б. Бямба-Очир “Тусгал” бүтээлээрээ шалгарсан юм.

   Norphei арт галлерейд дэлгэгдсэн “10l100 #ARCHITECTS” үзэсгэлэн энэ сарын 6-10-нд гарна.

Б.Бямбасүрэн