Монгол Улсад барилгын салбар үүсч хөгжсөний 92 жилийн ойг тохиолдуулан “Барилгачдын өдөр 2018” өдөрлөгийг өнөөдөр тэмдэглэн өнгөрүүллээ. Барилга хот байгуулалтын салбарыг хөгжүүлэх үйлсэд оюун ухаан, хүч хөдөлмөрөө зориулсан үе үеийн ахмадууд, тэдний үйл хэрэг, ажил мэргэжлийг залгамжлан хөдөлмөрлөж буй барилгачид хүрэлцэн ирсэн байлаа.



   Өдөрлөгийг нээж Барилга, хот байгуулалтын сайд Х.Баделхан хэлэхдээ, “БХБЯ НҮБ-ын хөгжлийн хөтөлбөртэй хамтран 2017 оноос барилгын салбарт эрчим хүчний хэмнэлт бий болгох, хүлэмжийн хийн ялгарлыг бууруулах зорилт бүхий төсөл хэрэгжүүлж эхэлсэн. АХБ-ны санхүүжилтээр 10, Польш улсын Засгийн газрын хөнгөлөлттэй зээлээр таван аймагт цэвэрлэх байгууламж барихаар шийдвэрлэж, ажлаа эхлээд байна. Мөн хоногт 250 мянган метр куб хүчин чадалтай Улаанбаатар хотын цэвэрлэх байгууламжийг барьж эхлэх ажлын сонгон шалгаруулалтыг зарласан. Агаарын бохирдлыг бууруулах, газар хөдлөлтөд тэсвэргүй орон сууцны барилгыг шинэчлэх, бага, дунд орлоготой иргэдийн орон сууцны хангамжийн асуудлыг шийдвэрлэх зорилгоор амины орон сууцыг ипотекийн зээлд хамруулах, Түрээсийн орон сууц хөтөлбөрийг боловсронгуй болгох гээд хийхээр төлөвлөсөн олон ажил байна” гэв. Энэ үеэр салбарын сайд яамны харьяа Хот байгуулалтын зураг төсөл, төлөвлөлтийн институтийг шинээр байгуулахаар болсныг дуулгав.



   “Барилгачдын өдөр 2018” өдөрлөгийн үеэр 1972 оноос хөтөлж, зах зээлийн нийгэмд шилжсэн цагаас хойш алдагдаад байсан барилгачдын гавьяа, суу алдрыг мөнхжүүлэх зорилго бүхий “Хүндэт дэвтэр”-т тэмдэглэх уламжлалыг сэргээв. Улмаар “Хүндэт дэвтэр”-т барилгын салбарыг хөгжүүлэх үйлсэд мэдлэг, оюун, хүч хөдөлмөрөө шингээсэн гавьяатай Л.Цэрэндондог, Л.Цээсүрэн, Г.Болд, Ө.Дорждэрэм нарын дөрвөн эрхэмийн гавьяаг дэвтэрт мөнхөлж, батламж гардуулав. Эдгээр хүмүүс нь барилгын салбарт зураг төсөл гаргагчаас ажлын гараагаа эхэлж, салбар яамны сайд, дэд сайдын удирдах албыг хашиж байсан эрхэм хүмүүс юм. Дараа нь “Промжилстрой” ХХК-ийн зөвлөх инженер Б.Батбаярыг Алтангадас одонгоор шагнав.



Барилгын салбарын “Тэргүүний барилгачин” хүндэт тэмдгээр;

   Мөн Монголын барилгачдын нэгдсэн холбооны ерөнхийлөгч М.Батбаатарын тушаалаар барилгын салбарын шилдэг цахилгаанчнаар Б.Амарзаяа, шилдэг бригадын даргаар Б.Ууганбаяр нарыг тодрууллаа.

Барилгын салбарын шилдэг аж ахуйн нэгж байгууллагаар;