Сонгинохайрхан дүүргийн 6 дугаар хорооны нутаг дэвсгэр, Ханын материалд 1002 айлын түрээсийн орон сууцыг энэ онд барьж, 2019 онд ашиглалтад оруулахаар төлөвлөснийг хотын удирдлагууд хэлж байна. БНХАУ-ын 25 сая ам.долларын хөнгөлөлттэй зээлээр баригдах түрээсийн орон сууц нь сургууль, цэцэрлэг, эмнэлэг болон авто зам, автомашины зогсоолтой, 9-15 давхар байхаар төлөвлөжээ. Орон сууц нь 30-75 ам метр талбайтай бөгөөд түрээсийн төлбөр нь ам метр тутамд 7500 төгрөг байхаар тооцоолсон байна. Үүгээр тооцвол 30 ам метр талбай бүхий орон сууцны түрээсийн сарын төлбөр 225 мянган төгрөг байх юм.

    Түрээсийн орон сууц ашиглалтад ороход иргэдэд дараах гурван нөхцөлийг санал болгохыг нийслэлийн Орон сууц корпорациас мэдэгдэв. Нэгдүгээрт, тухайн иргэн сонгосон байраа 15 жилийн хугацаатай түрээсэлж, өөрийн болгох боломж, хоёрдугаарт, урьдчилгаа 30 хувьтай тэнцэхүйц хэмжээний түрээс төлсний дараа найман хувийн ипотекийн зээлд хамрагдах боломж, гуравдугаарт, өмчлөхгүйгээр түрээслэх боломжийг санал болгож байна. Өмчлөх тохиолдолд нэг ам метр нь 1.1 сая төгрөг байхаар тооцсон аж. Одоогоор 1002 айлын түрээсийн орон сууцны барилгын зураг төсөл бэлэн болсон ч бүтээн байгуулалтын ажлыг эхлүүлээгүй байна. Мөн тус орон сууцыг Хятадын биш БНСУ-ын хөнгөлөлттэй зээлээр барихаар болсныг ТОСК-иас мэдээлж байна.

   Түрээсийн орон сууц хөтөлбөрийг 2015 оноос хэрэгжүүлж, одоогийн байдлаар 1512 өрх тус хөтөлбөрт хамрагдсан тоон мэдээлэл байна.