Монгол Улсын Ерөнхий сайд С. Батболд Монголын сонины холбоо, Монголын сэтгүүлчдийн нэгдсэн эвлэлийн Удирдах зөвлөлийн гишүүдийг 2009 оны 11-р сарын 30-нд тус тус хүлээн авч уулзлаа.

 

Монголын Сонины Холбооны Ерөнхийлөгч Р.Хадбаатар Ерөнхий сайдад өндөр албан тушаалд томилогдсонд нь баяр хүргээд сэтгүүлчдийн өмнө тулгамдаад байгаа асуудлуудын талаар санал солилцлоо.

 

МСоХ-ны зүгээс Зохиогчийн эрхийн тухай хуульд өөрчлөлт оруулах асуудлыг судлаж үзэх шаардлагатай байгааг онцлоод, ингэснээр сэтгүүлчдийн оюуны бүтээлийг зөвшөөрөлгүй хуулбарлах, интернэт сайтуудаар тодорхой нэр хаяггүй сэтгэгдлээр хүний нэр төр, хувийн амьдралд халдах, гүтгэн доромжлох зэрэг зохисгүй үйлдлүүдийг таслан зогсооход алхам байх болно гэлээ. Мөн 4000 айлын орон сууц хөтөлбөрийн хүрээнд сэтгүүлчдийг орон сууцтай болгох асуудалд анхаарал тавих, сэтгүүлчдийн хэлний болон мэргэжлийн чадавхийг дээшлүүлэх урт, богино хугацааны сургалтанд хамруулах зэрэг асуудалд Засгийн газрын зүгээс дэмжлэг үзүүлэхийг хүслээ. Монголын сэтгүүлчдийн нэгдсэн эвлэлийн ерөнхийлөгч Д. Сарангэрэл Ерөнхий сайдын албан тушаалд томилогдсон явдалд баяр хүргэж, ажлын амжилт хүсэв. Тэрбээр монголын сэтгүүлчдэд тулгараад байгаа асуудлуудын талаар Ерөнхий сайдад танилцуулав.

 

МСНЭ-ийн Удирдах зөвлөлийн гишүүд Мэдээллийн эрх чөлөөний тухай хуулийг УИХ-аар хэлэлцүүлэхэд анхаарах, 2011 онд болох Монголын сэтгүүлчдийн байгууллагын 60 жилийн ойн баярыг тэмдэглэн өнгөрүүлэхэд төр засгийн зүгээс дэмжлэг үзүүлэх, сэтгүүлчдийн уран бүтээлийг дэмжих сан байгуулах, сэтгүүлчдийн хэлний мэдлэгийг дээшлүүлэхээр богино хугацааны сургалтанд 20-30 сэтгүүлчийг хамруулах, сэтгүүлчдийн холбооны байр, мэргэжлийн сэтгүүлзүйн шүүмжлэгч бэлтгэх, 2013 онд болох Монгол улсад сэтгүүлзүй үүсэн хөгжсөний 100 жилийн ойг тэмдэглэх, нэрт сэтгүүлч Цэвээн агсны нэрэмжит Засгийн газрын шагналыг бий болгох, 40 мянга, 4 мянган айлын орон сууцны хөтөлбөрт сэтгүүлчдийг хамруулах зэрэг олон асуудлын талаар Ерөнхий сайдтай санал солилцож, анхаарлаа хандуулахыг хүслээ. Ерөнхий сайд С. Батболд хэлэхдээ нийгмийн оюун санаанд нөлөөлдөг хүчтэй зэвсэг болох хэвлэл мэдээллийн байгууллагын төлөөлөлтэй уулзаж байгаадаа баяртай байна.

 

Улс оронд болж байгаа үйл явдлыг олон нийтэд зөв зүйтэй хүргэж ойлгуулах нь их чухал. Та бүхэн манай засгийн газрын шүүмжлэгч, бас хамтрагчид байх учиртай гээд дэвшүүлсэн саналуудыг судалж үзээд хариу өгье гэж хэллээ хэмээн Засгийн газрын хэвлэл, мэдээллийн албанаас мэдээллээ.