Авлигатай тэмцэх газар авлига, албан тушаалын гэмт хэргийг мөрдөн шалгахын зэрэгцээ хээл хахуулийн “төрсөн дүү” гэгддэг хүнд суртлыг халах чиглэлээр олон ажил зохиож байна. Үүний нэг нь авлигаас урьдчилан сэргийлэх ажлын хүрээнд төрийн үйлчилгээг иргэдэд хөнгө шуурхай хүргэх, төрийн албан хаагчийн ёс зүйн дүрмийг сахиулах, авлига үүсгэх нөхцөл шалтгааныг арилгах чиглэлээр Авлигатай тэмцэх газар Сонгинохайрхан дүүргийн Газрын албанд бусад дүүргийн төрийн нийтлэг үйлчилгээ үзүүлдэг байгууллагуудын төлөөллийг оролцуулан харилцан туршлага судлах арга хэмжээг зохион байгуулав.

 

Тус албаны дарга нь танхимд суурилуулсан камераар мэргэжилтнүүдийнхээ иргэдэд хэрхэн үйлчилж буйг хянадаг болсон аж. Нэг ёсондоо төрийн үйлчилгээг хөнгөн шуурхай хүргэх наад захын нөхцлийг бүрдүүлсэн байна. Сонгинохайрхан дүүргийн Газрын албаны хувьд зөвхөн нэг цэгийн үйлчилгээгээр төдийгүй өмнө нь иргэдийг чамгүй бухимдуулж байсан дутагдлаа халж чадсаныг нь Авлигатай тэмцэх газар сайшаан дэмжиж, бусад ижил чиг үүрэгтэй төрийн байгууллагуудад үйл ажиллагааг нь танилцуулах, харилцан туршлага солилцуулах арга хэмжээш зохион байгуулсан нь энэ юм.