Дархан-Уул аймагт “Эрчим хүч хэмнэх” дэд хөтөлбөр хэрэгжиж эхэлжээ. Эрчим хүч хэмнэж, дэвшилтэт техник, технологи нэвтрүүлэх, хүлэмжийн хийн ялгарлыг бууруулж, уур амьсгалын өөрчлөлтийг сааруулах зорилготой уг хөтөлбөрийг боловсруулсан байна. Энэ ажлын хүрээнд эрчим хүчний хэрэглээнээс үүссэн байгаль, экологийн бохирдол, хүлэмжийн хийн ялгаралт дорвитой буурна гэж үзжээ.
 
   Энэ хөтөлбөр хэрэгжиж байгаа учраас Дархан-Уул аймагт эрчим хүчний хэмнэлттэй барилга байгууламж барьсан. Эрчим хүч бага зарцуулдаг машин, тоног төхөөрөмж, бараа бүтээгдэхүүн, материал үйлдвэрлэсэн, гаднаас импортлосон. Эрчим хүчний үр ашгийг дээшлүүлж хэмнэлт гаргасан иргэн, аж ахуйн нэгж, байгууллагад дэмжлэг үзүүлэх юм байна. Тиймээс эхний ээлжинд эрчим хүч хэмнэлт, үр ашигтай хэрэглээний талаар хэрэглэгчдэд зориулсан мэдээллийн сан бий болгох, сургалтын хөтөлбөрийг боловсруулж, сургагч багш нарыг бэлтгэх ажлуудыг шат дараатай эхлүүлэхээр төлөвлөжээ. 
 
   Эрчим хүчний хэмнэлттэй барилга байгууламжийн зураг төсөл хийх, барьж байгуулах, үйлдвэрлэл үйл ажиллагааны үр ашгийг дээшлүүлэх чиглэлээр холбогдох инженер, техникийн ажилтныг чадавхжуулан. Эрчим хүч зөв ашиглах талаарх хичээлийг ч мөн  ерөнхий боловсролын сургуульд тусгах арга хэмжээ авах, гудамж, зам, талбай, нийтийн эзэмшлийн газарт ашиглаж байгаа гэрэлтүүлгийг үе шаттайгаар эрчим хүчний хэмнэлттэй гэрэлтүүлэгт шилжүүлэх зэрэг ажлуудыг мөн хийх аж.

Н.Ганчимэг