Мэргэжлийн хяналтынхан нэг хэсэг өвөл барилга барихыг хориглож байсан. Гэтэл өнөө жил МАХН-ын шинэ байрнаас эхлээд хаа сайгүй барилгын ажил хийгдэж байна. Ингэхэд өвөл барьсан барилга хэр урт настай байдаг бол. Энэ талаар мэргэжлийн хүмүүс ямар бодолтой байдгийг Нийслэлийн мэргэжлийн хяналтын газрын Дэд бүтцийн хяналтын хэлтсийн дарга Ч.Мөнхжаргалаас тодрууллаа.

-Өвөл барьсан барилгын чанар муу гэлцдэг.  Гэтэл өнөөдөр хаа сайгүй барилга баригдаж байна. Энэ тал дээр танайх ямар бодлого баримталдаг вэ?

-Ер нь өвлийн улиралд барилга барьж болохгүй гэсэн дүрэм журам байхгүй. Гэхдээ цутгаж байгаа бетон хөлддөг тул байнга цахилгаан хүчдэл залгаж ажлаа явуулахаас эхлээд өвөл барьсан барилга асар өндөр үнээр босдог. Хугацаа алдмааргүй байна гэсэн зарим нэг байгууллага бетон цутгалтын технологи, дүрмийн дагуу зөвшөөрөл аваад, барилгын ажлаа хийж байгаа. Хүйтний эрч хасах 40 хэм л хүрчихгүй бол манайд ОХУ-ын Сибирийн бүсийн бетон цутгадаг технологийг барьж ажилладаг. Гэхдээ энэ арга технологийг эзэмшсэн туршлагатай аж ахуйн нэгж манайд цөөн. Стандартын дагуу баригдаагүй барилга хавар газар гэсэхээр аяндаа тар нь танигдана. Хоёр жилийн өмнө гадна дотнын хэд хэдэн аж ахуйн нэгжийн барьсан барилга шаардлага хангаагүй учраас бид буулгуулж байсан удаатай. Түүнээс болоод манай ерөнхий байцаагч өвөл бетон цутгахыг хориглосон албан даалгавар гаргасан. Энэ шийдвэр одоо ч хэрэгжиж байгаа.

-Өнөөдөр хэчнээн бай­гуул­лага өвөл ажиллах зөв­шөөрөлтэйгөөр  үйл ажил­лагаа явуулж байгаа вэ?

-Нарийн тоог нэгтгэж гаргаагүй байна. Арав хүрэхтэй, үгүйтэй байгууллага л өв­лийн улиралд бетон цутгах зөвшөөрөлтэй байдаг. Барилгын технологийн шаардлага хангасан бол гадна, дотнын аж ахуйн нэгж гэж ялгалтгүй бид зөвшөөрөл олгодог.

-Зөвшөөрөлтэй гээд барь­сан барилгыг хавар буулгана гэдэг аж ахуйн нэгжид ч хохиролтой. Түүнээс өмнө ямар нэгэн арга хэмжээ авч болдоггүй юм уу?

-Энэ жилийн хувьд зөвшөө­рөлтэй хэдхэн аж ахуйн нэгж л үйл ажиллагаа явуулж байгаа. Тэдний барилгын бат бөхийг бид лабораторийн шинжилгээгээр шалгана. Өвөл яаж ийгээд барьчихсан барилгыг хавар газар гэсэх үед цутгасан бетонын хашлагыг аваад үзэхэд л чанар нь танигдана. Тиймээс нэгэнт зөвшөөрөл аваад, барилга барьж байгаа бол барилгын зураг төслийн дагуу технологоо баримталж  сайн л барих хэрэгтэй. Эс тэгвэл хавар болоход барилга нь гологдоод, тухайн компани эрсдлээ өөрсдөө л хүлээх болно. Шаардлага хангахгүй бол бид тусгай зөвшөөрлийг хураахаас эхлээд барилгыг нь буулгах, давхрыг нь цөөлөх гэхчлэн арга хэмжээ авах л болно гэв.