Цахилгаан дамжуулах агаарын шугамын утасны чанар шалгах лабораторийг Хятадын Гуандун мужийн “Жинчинг кабель” компани Эрчим хүчний судалгаа хөгжлийн төвд бэлэглэжээ. Энэхүү лаборатори нь манай улсад хэрэглэгдэж буй хөнгөн цагаан цахилгааны утсыг хоёр төрлийн, зэс утсыг таван төрлийн техникийн шинж чанараар нь буюу утасны шаталт, суналт, бүрээсний эдэлгээ, орц материалын чанарыг шалган тогтоох аж. Цаашдаа тус лабораторийн бүрэн тоног төхөөрөмжийг  нийлүүлэхээ  “Жинчинг кабель” компанийн ерөнхийлөгч Хуан Ён Бо илэрхийлсэн байна.

Түүнийг 2005 оны 12 сард манайд ажлын айлчлал хийж явахтай нь САПУ худалдааны төв шатаж таарсан бөгөөд түүнээс хойш монголчуудын хэрэглэж буй цахилгааны утасны чанарт санаа зовних болсон гэнэ. Тиймээс дээрх лабораторийг бэлэглэж, орон нутагт одоо баригдаж буй өндөр хүчдэлийн шугамын чанарыг шалгаж ажиллахыг хүсчээ. Харин тус лабораторийн эрхлэгчийн хэлснээр цахилгааны шугамыг шалгах стандартыг удахгүй гаргаж, батлуулах юм .