Манай улсын алт олборлолтын салбарт дээгүүр байр эзэлдэг “Бороо гоулд” компани нийслэлд сая долларын хөрөнгө оруулалт хийхэд бэлэн байна. Тус компанийн Ерөнхийлөгч Жон Казаков өнөөдөр НИТХ-ын дарга Т.Билэгттэй уулзахдаа энэ тухайгаа мэдэгдсэн байна. Татвар төлөлтийн хэмжээгээр 2007 онд хоёрт, 2008 онд гуравт орсон тус компани Улаанбаатар хотын хөгжил, иргэдэд шаардлагатай байгаа төсөлд хөрөнгө оруулалт хийх сонирхолтой байгаа юм.

 

Тухайлбал, Туул гол дагуу байгуулж буй Үндэсний цэцэрлэгт хүрээлэнгийн тохижилт, эмнэлэгүүдэд нэн шаардлагатай байгаа тоног төхөөрөмж авах зэрэг төслийг санхүүжүүлэхэд оролцох бололцоотой гэдгээ мэдэгдлээ. Улаанбаатар хотын хувьд дэд бүтэц, бүтээн байгуулалтын шийдвэрлэх асуудал олон байгаа бөгөөд орон нутагтай амжилттай хамтран ажилладаг тус компани Улаанбаатар хотын бүтээн байгуулалтад хувь нэмэр оруулах санал тавьсанд талархаж байгаагаа НИТХ-ын дарга Т.Билэгт илэрхийлээд энэхүү хөрөнгө оруулалтыг нийслэлийнхээ хүн ардад чухал шаардлагатай байгаа ямар асуудлыг шийдвэрлэхэд зарцуулах талаар хотын мээртэй зөвлөлдөж, ойрын үед саналаа хүргүүлэхээ мэдэгдсэн байна.