Орон сууцны үнэ манайхны худалдан авах чадвартай харьцуулахад хавьгүй илүү үнэ өртөгтэй байгаа. Энэ тал дээр иргэд нэг зүйл хэлж байхад нөгөө талаас барилга угсралтын компаниуд өөр янзаар тайлбарладаг. Энэ бүгдээс зайлсхийж байр сууцны үнийг бууруулахад ямар зүйл дээр анхаарвал зүйтэй вэ гэдэг тал дээр хэлэх хэдэн санал:

• Барилгад өргөн хэрэглэгддэг цемент, шохой болон ханын материалын үйлдвэрлэл эрхэлдэг байгууллагуудыг олшруулан өрсөлдөх чадварыг нэмэгдүүлж материалын өөрийн өртөгийг бууруулах
• Барилгын томоохон гүйцэтгэгч байгууллагуудад элс хайрганы орд газрыг эзэмшүүлж, түүхий эдээ үнэгүй авахад нь төр засгаас туслах
• Орон сууцны үнийг барилгын компаниуд бие даан дураараа тогтоож, нэг хавтгай дөрвөлжин метрийн үнийг хэт өндөр тогтоож байгааг төр засгаас анхаарч барилгын үнийн өвөрмөц татвар ногдуулж барилгын өөрийн өртөгийг бууруулах арга хэмжээ авах
• Гадаадаас импортлож байгаа барилгын цахилгаан, сантехник болон бусад гол нэр төрлийн материалуудыг гаалийн татвараас чөлөөлөх
• Шинээр баригдаж байгаа орон сууцны гадна инженерийн шугам сүлжээний ажлыг анхны худгаас төвийн болон салбар шугамтай холбох хүртлэх ажлын өртөгийг улсын болон орон нутгийн төсвөөр санхүүжүүлэх
• Газар өмчлөгчийн газар дээр газар зохион байгуулалтын төлөвлөлтөөр нийтийн орон сууц барих тохиолдолд газар өмчлөгч нийтийн болон өөрийн эрх ашгийг бодолцон чөлөөлж, өмчлөх эрхийн солилцоо хийж, газар болон орон сууц өмчлөх эрхтэй болох
• Байгалын баялаг, ашигт малтмалаас олсон ашгаас тодорхой хувийг орон сууц барих болон үл хөдлөх хөрөнгөтэй болгоход төр засгаас тодорхой шийдвэртэй ажил зохион байгуулах
• Хотын захын хорооллоор баригдаж байгаа амины орон сууц хауст шингэрүүлсэн шатдаг хйигээр ажилладаг бага оврын тоног төхөөрөмжийг суурилуулж, сантехникийн шугам сүлжээний зардлыг багасгах, салхины хүч нарны энергийг ашиглан эрчим хүчний эх үүсвэрийг бий болгож эрчим хүчний зардлыг бууруулах
• Гэр хорооллыг орон сууцжуулахад иргэдийн оролцоо чухал бөгөөд иргэд нэгдсэн зохион байгуулалтад орж нөхөрлөл байгуулан орон сууц барих явцад барилгын туслах ажил хийх, орчны зам талбайн тохижилт цэцэрлэгжүүлэлтийн ажлыг хамтын хүчээр хийж орон сууцны өртөгийг бууруулахад хувь нэмрээ оруулах
• Орон сууцны орчны зам талбайн тохижилт, ногоон байгууламжийн ажилд орон нутгийн төсвөөс тодорхой гаргаж, ард иргэдээ ая тохитой цэвэр орчинд амьдрахад нь туслалцаа үзүүлэх
• Орон сууцны барилгын ажлын явцад дотоодын, хөндлөнгийн болон мэргэжлийн хяналтыг цаг хугацаанд нь хийлгэж, барилгын ажилд гологдол гаргаж үргүй зардал гаргахаас урьдчилан сэргийлэхэд анхаарч ажиллах
• Орон сууцны өрөө тасалгааны орон зайг оновчтой төлөвлөж, өрөө тасалгааны орон зайг хэмнэх
• Орон сууцны дотор заслын ажилд хуурай шавардлагыг өргөнөөр хэрэглэж барилга барих хугацааг хэмнэж өртөгийг багасгах

Эдгээр саналыг “Орон сууцны үнийг яаж хямдруулах вэ?” хэмээх сэдвийн дор хэлэлцүүлэг болгох саналтай байна. Энд дурьдаагүй өнгөрөөсөн зүйл байвал та өөрийн санал бодлоо нэмэрлээрэй.